Tulio Europe nih an i buaipi ngai mi cu Russia nih NATO ram chung ah a thli in

Tulio Europe nih an i buaipi ngai mi cu Russia nih NATO ram chung ah a thli in
=========
Tulio Europe nih an i buaipi ngai mi cu Russia nih NATO ram chung ah a thli in ngiathlaitu (a deep-cover spy) a thlah mi pawl kong a si. Russia hi deep-cover spy lei ah neihchiah thazaang (resources) tam pi dih in a cawlcang zungzal mi a si. Russian deep-cover spy pawl cawlcangh ning theih duh ahcun Netflix series ah “In from the Cold” ti mi va zoh te hmanh uh. Ukraine a tuk ruang ah a tu cu indirect in NATO he ai tu bantuk an si cang caah NATO members ram tampi ah deep-cover spy hi thlah i zuam sehlaw a dawh.

Nizan nai ah Norway chaklei um university minthang pakhat Tromsø University ah researcher rian a ttuan lio mi pa cu Russian deep-cover spy a si tiah an tleih. Cu pa cu Brazil ram mi ka si tiin Brazil passport he Tromsø University ah rian a rak sawk mi a si i, a taktak ah Norway chak lei North Pole hrawng i Norway cawlcangh ning ngiat-thlai i Russian Military Intelligence sin ah info hei pek ding kha a rian taktak a rak si tiah an ti.

Norway chak lei vur nih a khuh dih mi tikulh (Arctic in North pole) hi carel kho nih a kong rel te hmanh uh. Research centers tampi an chiah nak, US le Russia caah next battleground a si te lai an ti mi hmun a si. Cu pa lawng a si loh, Norway chaklei ah Russian ramri in a hung lut mi Russian cheukhat cu drone he Norway ramchung ah an rak lut i spy an si lai ti mi lunghrinh in an tleih mi an um len rih.

Nai te tthiam ah Netherlands ram ICC umnak The Hague khua ah ICC ah internship in rianttuan ding a rak ra mi pa cu Russian deep-cover spy a si tiin Netherlands ram security agency nih an tleih ve. Hi pa zong hi Brazil mi ka si a ti i Brazil passport he an tleih ve. Russia nih Ukraine ah “war crime and crimes against humanity” sualnak a buar tiin ICC nih tazacuai ding in case an on. Cucaah cover spy kha ICC ah an van thlah nak a si lai tiin an ruah.

Hi deep-cover spy pawl hi kum 5-10 chung training an pek hna i cu chung ah an identity le nationality pawl an thlen ti a si. Thiamnak sang a nei mi le skill phun2 a nei mi kha an hman tawn hna. Hi pa zong hi Dublin Trinity College le Johns Hopkins University ah sianginn a dih mi a si an ti. Hi lawng a si loh. Italy ram Nepoli khua ah russian cover spy an tleih mi nu zong a um hoi.

Ral thawh lio a si tik ah Russia nih a lam kip in nitlak ram lei kha tei khawh le thlak khawh ai zuam ve caah tleih khawh rih lo mi russian cover spy hi tampi an um rih kho ko tiin an ruah. Cucaah nitlak ram lei security agency pawl zong ralring deuh in an um ve, an thazaang an tthawn ter ve. Nan rel huam zawng a si le si lo ka thei lo. Nai hrawng Europe lei ah a lar ngai mi thawngpang ka van in hromh mi hna a si. Credit; Sangukceu Zinhlawng

Be the first to comment

Leave a Reply

Your email address will not be published.


*