Hakha Khuachung Ah Kahdohnak A Chuak Ṭhan, Zungkip Fonh Zung Pi A Kaang!
==========
October 18 zinglei sml 1:12 hrawng ah Hakha khua chungah kahdohnak a chuak ṭhan, tiah theih a si. Tualchung mi pakhat nih, “Myanmar Economic Bank hrawng le zungkip fonh(စုပေါင်ရုံး) zung hrawng in meithal thawng pehtlai in a thang. Voidang hriamngan an kah caan ah a thang bal lomi hriamngan thawng zong voi thum hrawng a thang. SAC ralkap nih seh meithal pehtlai in an kah i, kuan a zuan thawng zong kan theih,” tiah a chim.
“Hakha khua chung ummi SAC ralkap le palik hi an tlawm deuh ngai cang. A ruang cu timit leiah thazaang chap ding in SAC ralkap le palik cu a kal mi an tam ngai. Zungkip fonh a hngaktu hi palik deuh an si i, a tam bik ah panga hlei an si lai lo,” tiah min langhter a duh lomi pakhat nih The Chin Post ah a chim.
Meithal thawng pehtlai in a than lioah meithat motor pahnih an kal i, meikang cu an phalh len ko nain zung chung cu a ciam dih ko. Zingka khuadei tiang mei khu cu a dai rih lo, tiah mithmutu pakhat nih The Chin Post a chim.
Halkha khua chungbak i hi tining tein i kahdoh le inn kangh asi pengah cun halkha khua cu kan zam dih hau ko lai. Zan khua deuh kan i hngilh kho loh. Suhpawng zung cu kan inn pawng asi fawn i ih ngam zong asi loh.a kap tu vial nih ahimnak hmun ah zam khua chungmi vial nih zam lo in um cu fawi loh.
Nizan ah Mithat mawtaw 2 khangh hmasa asi. Cun tuhi zung khangh. A poi hringhran eee…. Thantlang bantuk cu phan hram ti hlah usih! Pathian nih kan ralkap dirpi tualmal ko hna seh! (A ni thla balte khi palhsual bia a si maw nihin ni Oct 18 cu sikaw , zaantim cu kan phan deuh rih loh).
Thantlang aciam dih bantuk in Hakha hi cu si hram ti hlah seh mu! khua fak pi in nan kan ruah pi ahau cang lai hih! Zungkipfonh zung cu le meithat zung pawl cu a pamhmai ko. Kaang ding ahcun. poi tak si. zei ti tha. a ruangtampi a um khawh caah a si ko.
Matupi Pengkulh Fim Cawnnak Zung Lutlai U Tin Luai Cu CDF-Matupi Nih Kan Fimhlawm Tiah An Thanh! Chin ramkulh, Matupi ah pengkulh fimcawnnak zung lutlai U Tin Luai cu CDF-Matupi nih kan fimhlawm tiah nihin October 17 ah CDF-Matupi nih cathanh an chuah. U Tin Luai cu a luancia October 16, zaan ah Matupi khuachung a umnak inn ah meithal kah in thah a rak tong.
CDF-Matupi nih cathanh an chuahmi ah cun U Tin Luai cu SAC ralkap rianṭuannak tangah a ummi fim cawnnak hma a kal khawhnak dingah rian a ṭuantu Non-CDM pakhat a si, CDM a tuahmi hna cu a phunphun in tlerhkhonhnak a tuah hna leng ah Non-CDM tuah ṭhan ding in a fialchih hna, CDM tuahtu hna cazin cu SAC ralkap sin ah a kuat hna.
Cheukhat CDM tuahtu hna cazin min cu cunglei ah pe loin a um i SAC ralkap pension a la cangmi bu-hmu Win Naing he i bawm in CDM tuahmi hna thlahlawh an chuah i an i lak tawn tiah an langhter. CDF-Matupi nih U Tin Luai cu ca in voi thum, kaa in voi tampi ralrin peknak tuah a si cang ko na in, kan chimmi nawl a zulh duhlo caah CDF-Matupi nih kan tawlrel hi a si tiah an langhter.
CDF-Matupi nih ralrin peknak thanhca (no.2/22) le (no.4/22) ah langhter ning ah mipi a leirawitu tiah hmuh a si i, SAC ralkap kan dohnak ah SAC ralkap bochanmi le a hmanrua dirhmun in a um caah U Tin Luai cu fimhlawmnak kan tuah hi a si tiah CDF-Matupi nih October 17 ah cathanh an chuah.
Chinram lei a kaimi motor bomb puahhnawh an tong caah minung tam ngai an hliam! Kalaymyo In Chinram Ah A Kaimi Motor Pakhat Bomb Nih A Puah Hnawh Caah Khualtlawng Minung 10 Leng Hliamhma An Pu Khualtlawng a phurmi Hmanlung motor cu Kalaymyo in Laitlang lei a kai lio, October 14 ah Tedim peng Tai Ngen khua cuanhnak lonh ah ruah lo piin kutser bomb nih a puak hnawh i, kum 10 tluk ngakchia pakhat telh in khualtlawng minung 10 leng hliamhma an pu, tiah theih a si.
Hliamhma pumi Chin nu pakhat nih, “kei hi cycle in ka kal i, ka hmai ah minung 20 hrawng a phurtu Hmanlung pakhat a kal ve. Tai Ngen khua cuahnak pawng an phanh ah bomb a puak i a thimi an um le um lo cu ka thei lo,” tiah a chim.
Akiangkap ummi keimah telh in a tlawm bik minung 10 cu kan i hliam lai.
Cu chungah hliamhma fakmi hi 4 an si i, pawngkam a ummi hna nih Kalaymyo ralkap sii-inn ihkhun 100 ah an kan kalpi, atu hi ka van dam deuh ca ah sizung fami ah kai thial” tiah a chim chap. Cu bomb puahnak ruangah motor lam cu ai bauh dih. Motor zong a thlalang a kuai i, cycle pakhat zong a rawk dih, tiah theih a si.
Kalay-PDF No.4 Battalion In Ralkap Pahnih Nih Ram Le Miphun Ca ah An Nunnak An Pek. Kalay-PDF No. 4 Battalion in ralkap Aung Than Sein, pumpak No. P12104260 le ralkap Thu Rein Soe, pumpak No. P12104264 hna nih ram le miphun ca ah an nunnak an pek, tiah Kalay-PDF nih cathanh an chuah.
PDF-Kalay No. 4 Battalion in ralkap pahnih cu, an biakam bantukin hranhram uknak doh in Federal Democracy ser nakding ca ah ralhmun pakhat ah ral an tuk cuahmah lio, 2022 October 11 ah an nunnak a liam hi a si.
Atu bantuk in ram le miphun le mizapi ca ah nan nunnak nan pekmi cungah No.4 Battalion nih upatnak kan in pek hna. Nan tantaak mi nan chungkhar zong an ngaihchiahnak kan hrawmpi hna, tiah Kalay-PDF No. 4 Battalion nih cun cathanh an chuah.
Kyainnsaitkyi Ah SAC Ralkap Khah-Mah-Yiah 358 In Ralbawi Hna Telh In Ralkap 16 Tlaih An Tong, 6 An Thi. Kayin ramkulh, Kyainnsaitkyi(ကြာအင်းဆိပ်ကြီး) peng KNU brigade 6 hmunhma ah SAC ralkap khah-mah-yiah 358 le KNLA battalion 17 le tualchung hriamtlai phufonh kar ah ni 4 chung pehtlai in kahdohnak a chuah caah SAC ralkap 6 an thi.
Bu-hmu pakhat le bu-kyi pakhat telh in SAC ralkap 16 nih an hriam an chiah i an nun bu in an tlaih hna tiah theih a si. Kyainnsaitkyi(ကြာအင်းဆိပ်ကြီး) peng, Kyainn(ကြာအင်း) khua le Tagay(တဂေး) khua kar ah hmunhma thianhhlimhnak a tuahtu SAC ralkap khah-mah-yiah 358 le KNLA phufonh kar October 13 in 16 tiang kahdohnak a chuak.
KNLA phufonh nih fakngai in hliamh a tongmi SAC ralkap chung in minung 16 cu an nun bu in tlaih an tong hna pinah hriamthil zong an lak khawh tiah theih a si. An lakmi hriamthil ah cun MA meithal 17, hriamngan pakhat, kuanfang tampi le ralkap hmanmi thilri hna an si tiah theih a si.
Khin U Ah Rallam Sialtu SAC Ralkap Kahdoh An Tong, 8 An Thi. Sagaing ramṭhen, Khin U peng ah rallam sialtu SAC ralkap hna cu kahdoh an ton caah ralkap 8 an thi tiah Khin U Special force Organization (KSO) sin in theih a si.
Ye U in raltuknak motor pakhat he rallam sialpah in Mutein(မူးတိမ်) tiva hleidonh hrawng ah a ummi SAC ralkap le pyusawhṭi sin ah riahcaw chan ding in a kalmi SAC ralkap le pyusawhṭi hna cu October 17, zinglei suimilam 6:20 hrawng ah tualchung hriamtlai phu hna nih an kahdoh hna tiah theih a si.
SAC ralkap le pyusawhṭi hna umnak ah riahcaw chan ding in a kalmi ralkap hna cu an lamthluan ah i runvennak a tuahtu an mah ralkap le pyusawhṭi minung thazaang 70 hrawng cu Khin U Special force Organization (KSO), Khin U peng pah-kah-phah le LPDF phufonh nih bomb le drone hmang in an doh hna caah SAC ralkap le pyusawhṭi 8 an thi tiah KSO nih an thanh tiah theih a si.
Chaung U-Pakokku Lam Kam Um Khuate A Khangtu SAC Ralkap Kah An Ton Caah 6 An Thi. Sagaing ramṭhen, Chaung U-Pakokku lam kam um khuate a khangtu SAC ralkap pawl cu, voihnih tiang kah an ton caah 6 an thi, tiah Chaung U PDF nih cathanh an chuah.
Rallam a sialmi SAC ralkap pawl cu, Chaung U Middle Wolves Army le CHUPDF, Companny 3 ralkap hna nih bomb lung khat in an puahhnawh hna i, SAC ralkap 6 an thi, hliamhma pumi zat cu fiang in kan thei lo, tiah PDF nih an chim. SAC ralkap nih Ngalungtin khua cu October 15 zanlei sml 3:40 in an khangh i, October 16 zing sml 2:00 tiang a kangh caah inn 150 a ciam, tiah Chaung U PDF nih an langhter.
Chaung U Middle Wolves Army le CHUPDF, Companny 3 nih SAC ralkap 40mm bomb kuan lung 13 kan lak khawh, tiah Chaung U PDF nih cun an langhter. Cu kahdohnak ah Chaung U Peng Pah Kah Phah, Monywa pengkomh Battalion 6, Companny 1 hna i bawm in an kah hna i, PDF lei in a thimi le aa hliammi an um lo, tiah theih a si.
Shwe Bo Ah SAC Ralkap Motor Le Cycle Cu Bomb Puahhnawh An Ton Caah Ralkap 5 An Thi. Sagaing ramṭhen, Shwe Bo pengah SAC ralkap an i citmi motor pakhat le cycle 5 cu bomb puahhnawh an ton caah SAC ralkap le pyusawhti 5 an thi, tiah theih a si.
October 15 zanlei sml 2:30 ah Palai khua ah umhmun khuarmi SAC ralkap le pyusawhti cu, Shwe Bo in Palai khua lei an kal lioah Chipar(ချီပါ) khua le Metaw(မဲတော) khua kar ah PDF nih bomb lung 8 an puahhnawh hna caah SAC ralkap 2 an thi.
October 15 zanlei sml 6:30 ah Palai khua in Kunseih khua lei ah cycle 5 in a kalmi SAC ralkap pawl cu bomb lung 8 in an puahhnawh ṭhan hna caah SAC ralkap le pyusawhti 3 an thi i 4 hliamhma an pu, tiah theih a si. Cu bomb puahhnawhnak ah Thidi Shin PDF, Golden Triangle PDF Companny, Shwe Min Thar PDF, Lightning Storm PDF, Shwe Freedom Force le a dang PDF phu 7 hna i bawm in an puahhnawh hna, tiah theih a si. Credit: The Chin Post
Leave a Reply