Uknak An Laak Mi Kong Ah Zaw Min Tun Nih A Phuan Dih Cang

Min Aung Hlaing Uico Pa Zaw Min Htun Nih A Phuan Dih Cang Ko Hih

Ralhraang phu hruaitu Lainawng pa Min Aung Hlaing le ralhraang bawi cheukhat hna nih kum 2008 phunghram pi he aa tlaak ning in rampi uknak kan tlaih chungmi si tiah uknak le nawl neihnak an rak laak ka tein an rak chim lengmang nain nai tan i BBC nih ralhraang phu lei in biachimnak nawl nei tu Zaw Min Htun sin biahalnak hmanung bik an tuahnak ah a phuan ruangmaang cang ko.

Uknak kan laaknak ah hin upadi ning tein kan laakmi si loin kan mah lei nih aa rem kan ti ning le kan duh ning in kan laakmi si ko, uknak kan laak hlaan zan ah khan rampi hruaitu simi Daw Aung San Suu Kyi le President U Myint telh in hruaitu dang dang pawl kan tlaih cia hna.

Zan ah kan tlaih hna i a thaizing lawng ah 2008 phunghram pi ning in caan zei maw zat chung uknak le nawl neihnak cu ralhraang phu lubik sin ah pek a si khawhnak hnga Emergency meeting au in U Myint Swe cu caan karlak President ah kan chiah hnu ah nawl neihnak vialte cu ralhraang kut ah kan pek ter.

Uknak laak ding in hin a dang tein timhtuahnak zei hmanh kan rak neih ciami um lo in zan tlai hnu in kan laakmi si ko, mah lio ah hin Vice President simi U Myint Swe hi Nay Pi Daw ah a um lio si i a thaizing ah U Myint Swe sin ah thawngthanhnak kan tuah, thawngthanhnak kan tuah hnu ah a herh ning in rian kan ttuan tiah Zaw Min Htun nih BBC ah cun a chim.

Ralhraang phu an pu simi Min Aung Hlaing telh in ralhraang pawl nih an i tlaih bakmi kum 2008 phunghram pi ning ah cun National Defense and Security Council tiah auhmi laakhruai meeting tu hi auh hmasa ding si, mah hnu ah rampi president nih uknak le nawlneihnak kha ralkap lutlai sin ah pek khawh ding a si.

Tu tan ah Zaw Min Htun nih BBC nih interview an tuahnak ah a chimmi ning zoh tik ah uknak le nawl neihnak an laak ning hi 2008 phunghram ning he a si hrim hrim lo i phunghram he aa kalh ning bak in le an mah duh ning in an laakmi hrim hrim a ssi ko timi hi si.

Cu nih a langhtermi cu Min Aung Hlaing te phu an mah bak rampi cozah cungah phung a buar tu an si, rampi president le state councellor telh in hruaitu cheukhat hna zong hriamnaam bochan in an tlaih hna, an thil tuahmi vialte hi upadi ning in an tuahmi zei hmanh a um lo timi cu Zaw Min Htun bia chimmi nih a langhter dih ko cang.

Credit. Zinghmuh News

 

Be the first to comment

Leave a Reply

Your email address will not be published.


*