Ukraine nih “EU Chungtel Si Khawhnak a Chunmang” a takin i Nunpi khawhnak Caantha ai Ngeih Kho Cang!

Ukraine Nichuahlei ah Kahdohnak Linhsat a Panh; Ukraine nih “EU Chungtel Si Khawhnak a Chunmang” a takin i Nunpi khawhnak Caantha ai Ngeih Kho Cang!
==========
Ukraine nichuahlei ah raltuk linhsat a panh. Khat te lei kap ah Friday ah khan EU nih an chungtel si kho dingin a cungah duhsaknak an langhter ve, tiah theih a si. Ukraine le a raminnpa Moldova hi EU chungtel ah telkhawhnak kutka onpiak dingin EU palai pawl nih duhsaknak nganpi an ngeihpiak hna. Cucaah, hmai zarh ah khin cu an duhsakpiaknak hna cu a takin EU hruaitu hna nih tlam an tlinter te lai, tiah ruahchannak a um.

“EU nih zalonnak tuanbia thar an tial khawhnak lai, ka mi Ukraine hna an ralthatnak nih lam an sialpiak cang hna. A donghnak ah cun Russia le EU karlak ah a ummi Eastern Europe i buaibainak cu phelhral khawh a si cang lai,” tiin Zelensky nih a chim. Brussels ah ram khat le ram khat i biachonhnak that lei a panh ve rup in, nichuahlei Donbas pengkulh ah kahdohnak zualhmat a panh chinchin ve. A tu hi British Prime Minister Boris Johnson Kyiv lei ah a tlawn lio pi a si.

“EU chungtel ram pawl biachah ding lawng a tang ko cang. EU nan thazaang, nan zalonnak le nan thanchonak hi Ukraine kongah nan langhter awk a si” tiin Zelensky nih a chim. EU nih Ukraine an dirkamhnak kong EU Commission President Ursula von der Leyen nih a thanh lio ah hin anmah Ukraine flag rong angki ai aih, ti a si.

“EU nih kan dirpimi thil kongah cun Ukraine mipi hi thih zong ready an si cang. Kan EU chunmang hi kanmah he an i nunpi khawh ve dingmi hi kan duhpiak ngaingai hna,” tiin Leyen nih a chim. St Petersburg i biachimnak a ngeih lio ah Putin nih Western ram, a bikin US, thalo in biaka in a phomh hna. Asinain, EU kongkau tu cu zeihuaha relpiak lo phun khin ai umter, tiah theih a si. “EU kongah buaipi ding kan ngei lo. EU hi cu ralkap thazaang a hmangmi phu an si lo. Chawlehtinak phu tham cu a mi zei ram paoh nih luh khawh a si mi a si ko,” tiin Putin nih a chim.

“Ukraine nih EU chung luh ai timhmi kong hi naihtein kan ngiatthlai peng ko. A hleice in EU chungtel ram 27 hna he i runventinak an tuah maw tuah lo, timi ko hi kan ngaitmi cu a si,” tiah Kremlin aiawhbiachimtu Dmitry Peskov nih a chim. February i Russia nih Ukraine ah a ralkap a tomtom in a kuat hna nili hnu ah Ukraine nih EU luh a sok colh ve, tiah theih a si. Soviet ram a rak si ve bal mi Moldova le Georgia nih nili hnu ah an sok colh ve. Hi ram pahnih ah hin Russia tanhtu tapung (separatist) an um len ve.

EU chungtel tling sikhawhnak dingah cun kum tamial caan lak a hau mi a si. Ukraine ram an i hruainak tampi remhsiam ta a hau lai. “Special military operation” tiin Putin nih a hmai a milhpiakmi ral nih cun minung a thong a sang in a thah cang hna, khuapi tampi hmang som in a som dih hna, minung million tamtuk an ram in a zamter cang hna. “Ukraine ka luhhnawhnak a ruang pakhat a si mi cu NATO ralkap hna hmangin ka pawngkam tiangin hmunhma khuar ai timmi Western ram pawl kham ka duh hna caah a si,” tiin Putin nih a chim.

Asinain, tutan ral hi chiatnak lei lawng te a hoih cang caah, Finland le Sweden zong nih NATO chung luh an duhnak kong Friday ah khan an thah ve cang, tiah theih a si. Cun Cold War hnu ah, tutan hi EU nih Eastern Europe lei tiang a lohma a kauhbik tum a si, tiah theih a si. Ukraine caah ral a tumi American minung 2 cu Russia nih an tlaih hna. “Ral thawh hi kan duh lo,” tiin American minung 2 nih cun video in an chim. Cu an chimmi cu vawlei pumpi cul in social media ah an tar.

Soviet Chan hnu Thangthar; EU chungtel sinak hi a hmun ngaingai lo – Turkey zong hi 1999 tein chungtel si dingin lam an awnpiak ko cang nain, cansaupi hngahngan a si. Tutan i Ukraine an cohlan a si ah cun, EU chungtel ram vialte lakah hmunhma in cun a kaubikmi ram, cun milu in 5nak a si ding a si. EU chungtel pawl nakin Ukraine le Moldova hi a let tamtuk in an si a fak deuh. Politics kongah a buaibai pengmi, timh ciamman in thahnawnak tuahnak tam, cun Russia a tanhtu tapung (separatists) pawl he zong kum tampi ai domi ram an si.

Asinain, Zelensky, 44 le Maia Sandu, 50 hi cu Western hruaitu hna a tanhtu an si i, Soviet Union chan hnu ah a thanglian mi chanthar minung an si. Nai cikua i Ukraine lei a tlawngmi ramdang hruaitu hna lakah Johnson hi a nehhnungbik a si i, Ukraine ralkap training pek ding kong a chim hnu ah, Ukraine nih teinak a hmuh hlan lo a lei ah tang dingin bia a kamh hna, tiah theih a si.

“Cohlan awk a tha lo mi dun le dang hmang in maw remdaihnak hi thokpi kan tim hna lai u ci” tiin Ukraine foreign minister Dmytro Kuleba nih Western ram pawl thazang a pek hna. Russia a mual phoh lem lo in ram khat le ram khat i lenkainak hmangin remdaihnak um khawhnak lam kan kawl lai, tiin French President Emmanuel Macron nih a chim caah, a tu bantuk in Dmytro nih a chim hi a si.

“Western ram pawl nih hin hriamnam bomh lawng si lo in, Moscow cungah phihkharnak tuah, cun a chap in chap chinchin bu in teinak nan kan tincoter awk a si,” tiin Foreign Policy timi magazine ah Kuleba nih a tial. “Chawlehthalnak kongah tlakchiatnak a va um ko hmanh ah, phihkharnak nan tuahmi hi a tha nan derter awk a tha hrimhrim lo. Putin nih cabuai cung biaruah ai thim ding vekvek le, ral a sunghnak hmangin a si hrimhrim awk a si” tiin a chim.

March thla lio i Kyiv a lak khawh ti lo khan cun nichuahlei peng Donbas lei tu Russia nih ai hmaithlak lawlaw cang. Anmah Russia a tanhtu tapung pawl nih hnarcheu ti awk deng hmunhma an i khuar cang. Russia zong thalo in phomh an tong ve, tiah theih a si.

Ukraine lei a thlahmi a ralkap tam u cu Sievierodonetsk le Lysychansk lei ah tongtaw burh in a burh hna caah, a ralkap pawl a thimi an tam ngamsam, tiah Friday ah khan Wasthingon hrambunh think thank Institution for the Study of War nih an chim. Credit: Chelsea Bawi

Be the first to comment

Leave a Reply

Your email address will not be published.


*