Ukraine Raldohnak a hnu bik thawngpang update!

Ukraine War Lastest News
======
“Kan Ralkap pawl Sievierodonetsk ah an i Chang kho ko rih, Chaklei ah Hma an Sawt ngai Sievierodonetsk ah Ukraine ralkap an i chang tialmal kho ko rih. Cun Russia nih an facang le thlaithlakmi hrawh an timhnak chaklei hmunhma le bangah cun Ukraine nih an nawr ngai hna, tiah theih a si.

Sehzung tampi a umnak Sievierodonetsk khua cu Russia nih bomb in rawk cikcek in a kah. Russia i a thawngtukmi a bomb kahnak thazang a khupthal lehkhawh dingah cun miakpi tamdeuh in kan herh ko, tiah Ukraine nih a chim.
Siverskyi Donets River nih a cheumi khuaunau Sievierodonetsk le Lysychansk hi Kuhansk pengkulh chungah cun Ukraine kut i a tangmi hnihchun an si. Hi pengkulh lak hi Moscow nih ai tinhbikmi a si ve, tiah theih a si.

“Russia pawl cu thothe bang an thi, Sievierodonetsk khua chungah kahdohnak a zualhma chinchin ko rih,” tiin Luhansk penguk Serhiy Gaidai nih a chim. “Siverskyi Donets tiva tan (ral pet) duh ah ti a puannak leikap in Russia nih hmalak ai tim, tiah ka ruah. Asinain, cu kong cu kan hna kan chit peng ko i, pakhat pakhat a um le cangka tuanhngan tein kan cawlcang colh ve te ko lai,” tiin Gaidai nih a chim.

Chaklei peng ah cun Kherson le Zaporizhzhia pengkulh pahnih tiangin Russia nih hmunhma lak ai tim cuahmah i, Russia phung le lam zul dingin nawl chuah hram a thok cang. Kherson pengkulh ah a ummi Ukraine ralkap hmunhma zong Russia nih a lak cang, tiah Ukraine defense ministery nih a chim. “Zaporizhzhia peng ah kanmah Ukraine ralkap pawl hma an sawtnak tete a um ve ko. A kan luhhnawhtu hna an i tinhmi vialte kan vaivonhpiak dih hna” tiin President Zelensky nih a chim.

Zaporizhzhia asiloah Kherson i a cangmi boruak kongkau cu Reutuers nih cun ai fiang thlu rih lo ati. Hi pengkulh pahnih chungah a ummi Russia lei tang mipi cheukhat cu Russia dirkamh dingin mipi duhnak kan hal lai, tiin timhlamhnak an ngei, tiah theih a si. Moscow nih Ukraine a luhhnawh hnu in minung tong tampi an thi, million nih ram an chuahtak. Ukraine le a ramdanghawi le belte nih cun hi raltuknak hi thatlotuk bia a si, tiin an ti ve.

‘Kan Tang ko lai” Russia Tsar Peter the Great i a 350nak chuah kum i Putin nih bia a chimnak ah tuanbia chungummi kan ram kan lak than lai, tiin a chim. “Peter the Great nih hin Great Northern War hi kum 21 chung khengte a kalpi. Sweden he zong rak i tu bal sehlaw a dawh, a ruang cu an sin zongin lakmi thilri a ngei. A ngaingai ti lo ah cun an sinin zeihmanh a la lo, Russia ta kha Russia kut ah a pek than bia khi a si,” tiin Putin nih a chim.

Russia miakpi thazang hi a thawntuk caah, an miakpi hmang kho lo dingin an ralkap pawl cu Sievierodonetsk khuapi lam cung lei phan dingin kan dawh (draw) hna, tiah Ukraine Svoboda National Guard Battalion commander Petro Kusyk nih a chim. “Nizan cu kan hual a tha ngai – zampah in cei cikcek in kan kah khawh hna, a cheukhat hmun le bangah cun sangkhat hnih tiang cu dawi/khirh khawh hna. Kadang hmunhma ah cun an kan nawr ve, asinain inn pakhat hnih tiang hrawng lawng khi a si,” tiin Petro nih TV interview ah a chim.

“Asinain ka ralkap pawl hi battery ai bunhmi miakpi an hman caah an battery nih a nguh ti hna lo i, an temtuar ngaingai. Cu bantuk battery za lakin kan i ngeih a si ah cun, kan raltukmi hi a khupthal kan leh khawh ko lai,” tiin Petro nih a chim. Sievierodonetsk ah tartahak in a ummi mipi hi 10,000 hrawng an um rih. Cheuhra ah cheukhat hi cu ral a thawh hlan tein a um cangmi an si, tiah Mayor Oleksandr Stryuk nih a chim.

Khuapi chung boruak kho ah Reuters nih fehternak a tuah kho rih lo. Sievierodonetsk in chaklei le thlanglei in nitlaklei tiang Russia nih hmunhma an lak chinchin cang i, Luhansk le Donetsk an umnak Donbas pengkulh i hmunhma a khuarmi Ukraine ralkap pawl erhtonh an timh hna.

Raltuk a linhsatnakbik he naihte ah a ummi Bakhmut khuainnpa, cite chuahnakbik khua Soledar i inn le lo vialte cu an ciam dih ngawt cang. Bomb hlanh khawhlo mi vawleikua innkhaan ah cun a tangmi khuami, a bikin tar rual, pawl a beng in an i peng hna. “Kannih cu kan tang ko lai. Hi ka khuasa kan si. Hi ka chuak kan si. Hi ral hi zeitik ko ah hme a dongh te ne lai?” tiin tahbu in kum 65 a si cangmi Antonina nih a chim.

Facang Kong; Nichuahlei Ukraine ah Russia a tanhtu, mahtein ai ukmi Donetsk Peoples’ Republic nih Ukraine caah ral a tumi Briton minung 2 le Moroccan cu an tlaih hna i thihdan an pek hna, tiah Russian news nih a chim. Nan biachahnak hi phungning zong a si pek lo, tiin British nih sual a phawt hna. Ukraine hi vawleicung facang le chiti a zuarbikmi ram pakhat a si ve. Ukraine Black Sea ports pawl Russia nih a phih hnu in cun vawleicung ah pam a tlung kho mi a si, tiin vawleipi a thin a phang ngaingai.

Russia nih Black Sea a phih peng ko rih a si ah cun minung million tamtuk rawllo in an um ti lai, tiah Zelensky nih Thursday ah khan a chim. “Russia nih ramdang sin facang kan kuatnak cu pei namah Western nih nan kan phihkanh caah a tu bantukin thil a tlun hi a si cu. Ukraine nih rili tilawng dinhnak i a tunhmi bomb pawl a phelh hna i, a dang kan duhmi an kan tuahpiak a si ah cun, a rili tilawng dinhnak pawl hi kan awn ve ko lai,” tiin Moscow nih Western ram pawl mawh a phurhter ve hna.

Putin bia cu a lawngkoromi bia an si, tiin Kyiv nih a ti ve. NATO chungtel Turkey nih Kyiv le Moscow karlak ah remdaihnak tuah ai tim. A kut chung a phanmi Ukraine khua le ram cheukhat chungin Russia nih facang zuar thok a timh. Cu ti i Russia nih Ukraine facang rumro ramdang sin zuar a timhmi cu Ukraine le Western ram nih cun firkhut rumro ah an chiahpiak ve.

Turkey asiloah Middle Eastern ram ah thlanglei Ukraine facang pawl na zorh hna lai maw, tiin Kremlin an hal i, “A tutiang cu lungtlinnak kan tuahmi a um rih lo. Kan i timhlamh lio pi a si,” tiin Kremlin aiawhbiachimtu Dmitry Peskov nih a chim. Credit: Chelsea Bawi

Be the first to comment

Leave a Reply

Your email address will not be published.


*