Update: Hakha khuachung ralhrang pawl cawlcanghnak kong!

Hakha Ah Mipi Minung 13 SAC Ralhrang Nih An Tlaih Hna, 7 An Thahṭhan Hna!
=====
Chin ram khualipi Hakha khuapi ah mipi minung 13 hna cu January 25 ah SAC ralhrang nih an tlaih hna i kum 16 tang minung 7 cu an thlahṭhan hna tiah Chin Human Rights Organization (CHRO) nih an langhter. Hakha Cawbuk sang ah CDF-Hakha le SAC ralhrang kahdohnak ah ralhrang pahnih an thi i a pawngkam ah ummi hna mipi inn inthum cu SAC ralhrang nih JCB in an hrawnh piak hna.

Matupi Ah SAC Ralhrang Nih Tualchungmi Minung 2 An Thah Hna! Chin ramkulh Matupi peng CDF-Matupi sakhan simi Ngalai khua cu January 15 lio i SAC ralhrang nih thazaang tampi in an luh hnawh hna lio ahkhan SAC ralhrang pawl nih tualchung mi minung pahnih hna cu tuksapur tuk in an thah hna tiah CDF-Matupi in chimphuannak nawl ngei Aron nih a chim.

Adang Media hna nihcun mipi minung 6 an thah hna tiah an langhter hna nain minung 2 an si tiah chim. Thah a tongmi hna cu U Lap Lian le U Van Bik hna an si i, U Lap Lian cu Mizoram ah ralzaam in a um nain Ngalai khua ah cikkhat a rak tlung ta lio ah SAC ralhrang nih an thah caah January 15 ah CDF in nunnak liammi pasalṭha he hmunkhat ah an ruak an khangh ṭii hna tiah theih a si.

SAC ralhrang nih thlanmual ah an thahmi U Van Bik ruak cu a liangleh in hri an ṭemmi le an hremnak hmape pawl hna, a ṭangah meithal khua le a hrom an ahnak pawl cu hmuhchih a si tiah CDF-Matupi in chimphuannak nawl ngei Aron nih a chim.

Ngalai khua cu CDF-Matupi nih an lakkhawh ṭhan cang, Ngalai khua hi a luanciami kum lio ahkhan SAC ralhrang pawl nih Mipi minung 9 an thah hna hnu in khuami dihlak nih khua an chuaktak tiah Zalen nih a langhter.

Khuapi Chung Kahdohnak Ah SAC Ralhrang 15 An Thi, PDF Minung 6 Nunnak Liam! Sagaing ram ramṭhen WetLet khuapi ah ni 7 chung pehtlai in kahdohnak a chuak i SAC ralhrang 15 an thi PDF minung 6 nunnak a liam tiah theih a si. Tangkhawng January 20 in 26, nihin tiang ah Wetlet (ဝက်လက်မြို့) khuapi chung ah SAC ralhrang kuttang zung pawl le a pawngkam khuate hna ah ralsial tu SAC ralhrang pawl cu tualchung mipi ralkap hna fonh nih an kah hna i Wetlet pengchung ah an hrampi simi zung pahnih an lakkhawh hna caah Lettop Computer 2 zong an lakchih.

Tualchung hriamtlai (People’s Army to Fight Dictatorship –PADF) in nawlngei pakhat nih “Khuapi chung ah ummi SAC ralhrang he aa pehtlai mi zung phunkip kan luhhnawh hna nain ralhrang he aa neihniam tuknak zung cheukhat cu kan la kholo, khuapi chung kan luhhnawh hna lio ah SAC ralhrang pawl nih khuapi chuahtak in khuate cheukhat mei an khangh hna.

Kanmah lei in nunnak liammi hna cu Moe Kyi (မူးကြီး) an khangh lio ah zahceu cu ralhrang lei ah an kal, cuka hmun kahdohnak ahcun an nunnak an pek” tiah a chim. Cu kahdohnak ahcun SAC ralhrang 15 hrawng an thih pin ah 5 renglo nih hliamhma an tuar. Tualchung hriamtlai fonh PAFD, DKPF –MMU, Eagle Guerilla Force lei in minung 6 nih ram le miphun caah nunnak an pek tiah, tualchung hriamtlai nih Khit Thit Media nih a langhter.

PDF – Chungtel Ramtang Ah Raltuk Cawnnak Ngei Cang Mi, Minung 14 Cu SAC Ralhrang Lei Tang Ding In An In Pe! SAC ralhrang nih PDF chungtel ramtang ah raltuk cawnnak ngei cang mi, minung 14 hna cu SAC ralhrang cozah sinah an in pe tiah langhternak an tuah. Tualchung PDF chungtel in SAC ah a pe mi hna lawmhpinak zong hi yangon SAC ralhrang inn (hall) pakhat ah tuah piak an si tiah an langhter.

Hi lawmhpinak inn (hall) chung ah hin, Yangon SAC ralhrang cozah hruaitu ding ah thim a simi zong a tel kho ve tiah an chim. Hi SAC ralhrang lei ah a pe mi hna lakah hin nungak pahnih zong an in tel chih fawn. January 2023 in SAC ralhrang dohnak ding caah thangka lei le ralthuam lei in tlamtlin lonak tamtuk an ngeih ruang ah, tualchung mipi vengtu PDF zeimawzah cu an in ngol cang tiah an langhter.

SAC ralhrang nih Myanmar Sagaing ramthen Wetlet khuapi a kah ruang ah, nausem thla 9 mi nunnak liam pinah kum 27 nu pakhat hlaimhma a tuar chih! SAC ralhrang nih hin tualchung mipi umnak ah fighter jet hmang in bomb zeimawzat an thlak i, bomb buakmi a pelpawi nih nausem thla 9 mi Yun Shwe Tin Sinh cu a lu ah a tlak in nunnak liam hi si. Cupin ah kum 27 nu Suh Wai Hlaing cu a ke vorlh lei ah hliamhma fakpi in a tuar tiah theih si fawn.

Mandalay Khuapi Hall Pakhat Ah Bomb A Puak, SAC Ralhrang Thimi An Langhter Hna! Mandalay khuapi, Maha Aungmye sang 78/38 lamtonnak ah ummi Yadanabon Hall a hngaktu hna SAC ralhrang pawl cu January 25, zaan suimilam 8:00 tluk ah ACID Army People Defense Force Mandalay bomb in an puahhnawh hna tiah theih a si.

Tualchung hriamtlai in nawlngei pakhat nihcun “Mipi hna harsatnak a kanpetu SAC ralhrang pawl cu bomb kan puah hnawh hna caah pahnih an thi i, hliamhma tuarmi zong an tam. An mah lei zong nih an kan kah ve nain Mission ṭuanmi hriamtlai chungin hliamhma tuarmi kan umlo, tiah Khit Thit Media ah a chim.

KIA Le PDF Fonh Nih SAC Ralhrang Sakhan An Khangh, Ralhrang Thimim Le Hliamhma Tuarmi An Tam! Kachin ramkulh Hpakan peng Hmawsizar Tower pawng ah umhmun khuarmi SAC ralhrang sakhan cu KIA Le PDF fong nih an kah hna caah ralhrang thimi an tampin ah hliamhmatuar bu he an zaam tiah theih a si.

Kachin Nwes nihcun “Tangkhawng January 25, zaan suimilam 8:45 tluk ah Hmawsizar Tower pawng ah umhmun khuarmi SAC ralhrang sakhan cu KIA Battalion 9 le PDF fonh nih an kah hna i SAC ralhrang thimi an tampin ah hliamhma tuarbu in an zaam dih hna i an sakhan cu mei in an khanghpiak hna tiah theih a langhter. “SAC ralhrang in a thimi le hliamhma tuarmi an tampi nain an milu zah tu cu thawngfiang kan theikho rih lo” tiah a langhter. Credit: Lungmili Post

Be the first to comment

Leave a Reply

Your email address will not be published.


*