US official nih Ukraine kahdohnak kongah thawngthanhnak an tuah!

US Official: “Ukraine nih Dirty Bomb a Hman lai ti ka Phang, tiin Russia nih a Chimmi hi Lih a si”
=============
Ukraine nih dirty bomb hman ai tim, tiin Russia defense minister nih a chimmi hi lih fangfak bak a si. Hihi Russia a dan a si, tiin Sunday ah khan US officials pawl nih an chim. Russia Defense Minister Sergei le US Defense Minister Austin cu ni 3 chungah voihnih phone in an i chawn i, cu lio ah cun Sergei nih a cunglei bia hi a chim.

Ukraine boruak kong kaphnih nih an i ceih, asinain an i ceihmi kong fiangin an langhter theng lo. Phone a chawn hmasatu hi Sergei hi a si. A hmual a tha taktak mi le uranium dat tiang in an cawhmaihmi dirty bomb cu Ukraine nih puah an timh, tiin Sergei nih a chim.

Asinain, mah ti a chimmi cu US, Ukraine le UK nih an zum hrimhrim lo. “Ukraine nih a ram chung lila i dirty bomb hman a timh, timi hrimhrim hi nan lih lawngte a si. Mah bantuk sualkawlnak nan tuahmi vialte hi buainak chuahter chinchin nan duh caah a si, ti hi vawleipi nih a theih te ko lai,” tiin National Security Council aiawhbiachimtu Adrienne Watson nih CNN ah a chim.

Kherson pawngah a ummi tikham nganpi hi Russia nih bomb in puah a timh le timh lo US nih naihniamtein kan conh peng ko, tiin US nih a chim. Sunday chunhnu ah khan, US State Department le France le UK foreign ministers he biaruahnak an ngei i, Sergei biachimmi hi lih lawngte a si i, Ukraine a nawlngeihnak hi kan dirpi lai, tiin lungtlinnak an tuah. Austin le Sergei an i chonh hmanungbik kha May ah khan a si i, Friday ah khan Austin nih Sergei cu phone in a hei chonh, tiah theih a si.

Ukraine Bawmh dingin Khua an Khanmi hi Republicans Kuttang ah cun Bialo a site kho men! Midterm elections ah Republican nih the House an co sual ah cun, Ukraine bawmh dingin dollar billion tampi an suisammi hi ri khiahpiak a tong kho men, tiah theih a si. November i Republican nih the House a co a si ah cun, January ah khin Speaker of the House si te dawhdang a si mi Kevin McCarthy nih cun US nih bawmhnak pek a timhmi hi a dirpi ko. Asinain, Republican nih the House an co a si ah cun zalongtein bawmhnak phaisa chuahpiak, timi hi a um theng ti lai lo.

Republican pawl hi American foreign policy kong a pelte hmanh i fiang hna hlah sehlaw a dawh, tiin Biden nih a chim. “Hi hna pawl hi thilsining an fiang lo. Mah hi bawmhnak hi Ukraine nakin a kau deuh mi thil a si – hihi Nichuahlei Europe he ai pehtlai. NATO kongkau a si. Hihi a tha lo taktak mi theipar pakhat a si,” tiin Thursday i Pennsylvania Senate candidate John Fetterman ca i fundraise an tuahnak ah Biden nih a chim.

Ukraine bawmhnak kongkau i Wednesday i McCarthy nih biahalnak a tuahmi hi kaphnih hruahphu a si. ‘Congress ah hin check and balance nan duh lai lo maw? Rian an zuammi taxpetu hna an phaisa zohkhenhtu mi pakhat khat tal nan herh lai lo maw?’ tiin CNBC ah a chim.

GOP pawl an lut ai thenthek; Hi kongah Republicans pawl kapkhat lawng in zoh hi a hman lo. Ukraine bawmhnak kong ah Senate Majority Leader Mitch McConnell zong nih a lungtlinnak a langhter bal. Cun Friday zongah khan Senate GOP majority zong nih Ukraine hi pehzulh in a bawmh ko rih lai, tiin biakamnak a tuah rih.

House Republican majority nih Ukraine bawmhnak kong hnursuan an i timhmi nih hin Ukraine ral hi tampi a khutthal a thlen te khawh men, tiin McCarthy nih a chim. Republican nih the House an co a si ah cun, McCarthy le McConnel karah ruahnak khat lo nak a um te kho mi a si. Republicans nih the House an co a si ah cun, thil zaran ca i hmanmi phaisa a zat thumh hi an i timh te lai, tiin McCarthy nih a chim.

America Firt Vs. Russia dironhnak; US hi ‘democracy miakpi’ a si, tiin Mike Pence nih a chimmi cu Thursday ah khan Laura Ingraham nih capo ah a seih i, kan US ralkap pawl hi ramdang an bawmhtuk hna ruangah an tha a batuk lawman cang, tiin Ingraham nih a chim.

US nih hin a hriamnam thatha pawl hi Europe ram pakhat bawmhnak ah a sawksam awk a si lo. Ralram i kan hriamnam pawl hman lengmang nak cha in cun, a chiah tu in an chiah ziar ah cun cu nih cun a thawnter deuh lai, tiin Indiana i Pence a hawipa a si mi Rep. Jim Banks nih a chim.

“Mah cucu nihin kan dirhmun te a si. Vawlei cung ram tampi nih an bawmh cuahmah ko mi ram ca i ri um lo in (blank check) bawmhnak kan pek a si ah cun, America First kan ti kho ti lai lo,’ tiin Banks nih McCarthy biaam in a chim ve.

Dirhmun ai thleng lelek; Tu kum chungah government funding bill ngandeuh a tla ding a si rih caah, cu tikah cun lawmakers pawl nih Ukraine bawmhnak kongah vote an thlak a hau rih lai. A nehhnungbik i House nih Ukraine bawmhnak ca i vote an thlak ah khan 368-57 tluk in an hlawh a tling. Vote a pe lo mi hi Republicans lawngte an si. Asinain, Republican mithar tampi hna cu Washington lei ah ai thial te ding an si caah, mah hi dirhmun hi ai thleng kho a si ko rih.

Rep. Mo Brooks, Alabama, zong a state lila ah a sung, a ruang cu Ukraine bawmh dingin vote ka thlak ruangah a ka zuamtu Katie Britt le Trump a adviser hlun Steve Bannon nih an ka doh caah a si, tiin a chim. Bannon hi Trump a policy dirhmun tampi ai tlaihtu a si i, Ukraine bawmhnak kongkau a doh zungzal tu zong a si. “Ka vote ka dirpi, kai lunghmuih fawn. Putin hi kham a hau. Ram chungah cun, ramkhel chirkanh ah a latu pawl hi America nih tuanvo a lakter hna hrimhrim a hau’ tiin Brooks nih a chim.

US nih zeizat dah a bawmh cang? Kiel Institute for the World Economy nih an chim ningah, US hi Ukraine a bawmtu bik ram a si, ti a si. GDP belte ah cun US hi a paruknak lawng a si. January 2021 thokin Ukraine a bawmhnak hi a dihlak ah $18 billion a phan cang. $725 million chap an si chom rih lai, tiin kan hnung zarh khan khan US Secretary Blinken nih a chim.

Mah vialte phaisa cu khawzei ah dah an kal? High-speed Anti-Radiation Missiles (HARMs), anti-tank hriamnam, hriamnam hme, HIMARS le a zenkuan, siai, high mobile mawtaw 200, miakpi kuan a thongthong in, Remote Anti-Armor Mine (RAAM) systems i a kuan pawl caah hman an si.

Ukraine bawmhnak kong a tuaktu hi Republicans lawng an si lo. Ukraine ralkap pawl Starlink internet service a bawmtu mirumpa Elon Musk zong nih a tuak len ve. Kan hnung zarh ah khan a bawmhmi hna service caah phaisa hal dingin Pentagon ah a vai thawh nain ai let than. Ukraine hi ka dirpi. Asinain, nai i Russia nih remdaihnak tuah a duhnak kong a langhter mi kong belte ah cun ka hmuhning ai dang ngai, tiin Musk nih a chim.

Musk hi remdaihnak caah lamkal rian a tuan lo i, a internet service hi Ukraine pawl a pek peng ko rih a si ah cun, nai i phaisa hal ding phunphai in ai lakmi zoh tikah, bawmhnak a tuahmi kongah a tha ba ngai cang sehlaw a dawh ko cang. Italy cozah thar chungah hin Putin i a hawitha ngai a si mi khahlan an Prime Minister Silvio Berlusconi hi i tel te dingin an chim.

Asinain, mah vialte hna nih hin US in maw, asiloah vawlei pi nih Ukraine hi a bawm deuh ti lai lo, tinak pakhat hmanh a um lo. Asinain, nai hrawnghrang in biatak tein nawl a hun ngei chinchin cang mi McCarthy hei ti bantuk mi lianngan cheukhat belte nih cun Ukraine bawmhnak an pekmi kong rengh deuh i tim hna sehlaw a dawh ko cang. Credit: Chelsea Bawi

Be the first to comment

Leave a Reply

Your email address will not be published.


*