Vanlawng kahnak project um ruangah Kawl ralkap vanlawng niam tein an zuang ngam lo!

Vanlawng kahnak
========
Vanlawng kahnak project um ruangah Kawl ralkap vanlawng niam tein an zuang ngam lo le vanlawng in kah le bom thlak tikah kan him deuh. Vanlawng paoh hi vanlawng kahnak paoh nih a thla kho lo. F22 khi meng 10 sang in a zuang kho le kahthlak cu chim lo a zuan le zuan lo hmanh theih a har. Hmuahchih tu cun thalphir zong in thlak khawh a si ko hnga.

Vanlawng kahnak project fund a si bantuk in a si khawh chung in zalh an izuam ko lai. Fund paoh cu dohthlennak caah a herh biknak zawn ah ai hmang dingmi an si ko. Nihsawh bantuk, capo bantuk, zumh lo bantuk in a ummi khi an tuak khawhmi zeite a um lo caah si. Dohthlennak bu le fund kawlnak bu cu khrihfabu General Meeting he ai dang tuk cuh.

A dik tuk e. Na chim bangin Vanlawng kahnak timi a phunphun in um i, Phunkhat cu timhcia in an chiah ko tu hi. Location cu public ahcun ka chim lai lo. Timh cia tein hlen lam cu poi pah ko hee. Timh ning tein izuam ve ko i asi kho tawk ah zai lo tein izuam ṭualmal kha ka uar.

Lai lei hi cu a kan cah lio ah cun sekhan piah nak ah an kan ti le “zeitin nan i piah maw” vun ti ah “kan saikel a rawk le ka remh! Inn thlang i facang a ba in kan lak mi kha kan vun cham le na kan kuat mi kha a dih cang! Sekhan piak lo awk le kan tha lo le vun kan kua than ko uh” ti peng kan si ko lai.

Lungrualnak In Teinak Ah! SAC ralkap cu nawlpeknak pakhat tang i an um caah lung i rual lo bu zongin an i funtom kho. Chinram dohthlennak ralkap hna hi nawlpeknak pakhat tangah kan um khawh lo caah i lungrual kan herh tuk. Nawlpeknak pakhat tangah um cu ahopaoh nih kan duhmi a si nain atu kan dirhmun ah cun a si kho lomi a si.

Asinain thachiat ding a si lo. A ruang cu nawlpeknak pakhat tangah um lo bu zongin kan hmuitinh ah lung i rual khawh a si ko. Mirang phungthluk ah “Maimomh hmanh nih an i lungrual ahcun Chiandeih zong an hren khawh (When spiders unite, they can tie down a lion)” ti a um. Dohthlennak ralkap hna kan i lungrual ahcun kan thiamnak le hriamnam hme hmanh seh law uknak ṭhalo hi kan tei khawh ko.

Lungrual timi cu ruahnak le hmuhning i khah viar khi a si lem lo, hmuhning le ruahnak i dan buin rianṭuanṭi khawh hi LUNGRUAL cu a si. Chinram ah pengtlang hoih in hriamtlai kan um cio i kan ruahnak le hmuhning aa dang liangluang ko lai. Asinain thil pakhat ah surlu bang kan i funtom dih ko. Cucu uknak ṭhalo tei a si. Zeiruangah dah tangka kan thawh? Zeiruangah dah hriam kan tlaih? Cucu kan i fian cio mi a si.

Atu i kan dirhmun cu kan Laiholh i “Thlan kam ah dir/thih ri le nun ri ah um” timi kha a si. Thlan kam ah kan dir bu hmanh in kan i lungrual khawh lo ahcun Chin miphun nih kan ca le holh chungin LUNGRUALNAK timi biafang hi kan hlonh a hau hnga!

Nihin ah cun uknak ṭhalo tei ding hi i hmaithlak cio ko usih. A tei hmanh kan tei hlan ah tei hnu i covo le umdan ding kong ruah len a hau lo. Uknak ṭhalo hi kan tei hmasa a hau. Kan tei hnuah a simi paoh si te ko seh.

Kanmah le kanmah kan i doh zong a si kho, kan tei hlan nakin kan buai deuh zong a si kho. Asinain cucu a si rih lomi an si, a si khomi lawng a si. Atu i kan ton cuahmah mi le a tak in a cang cuahmah mi tu hi i hmaithlak phot ko usih. Kawl nih “A hnu i buainak cu a hnuah tuahremh ding a si (နောက်ပြသနာ နောက်မှရှင်း)” an ti bantukin kan tei hnuah a cangmi cu kan tei hnuah tuahremh ding a si ko lai.

A cang cuahmah mi hmanh kan tuahremh khawh rih lo lioah a cang rih lomi kong i kan buai ahcun zeitindah lohma a kal khawh hnga! Hmailei ca cu ruah phung, tuaktan phung a si, asinain thaizing ca na ruah tuknak ah nihin na rian tlolh ding a si lo.

BC chan lio i Latin caṭialthiam Publilius Syrus nih “Lungrualnak a umnak paoh ah teinak a um zungzal (Where there is unity there is always victory)” tiah a rak chim. American ramkhel thiamsang Thomas Paine zong nih “Milu zat ah si loin kan lungrualnak ah kan ṭhawnnak cu a um (It is not in numbers, but in unity, that our great strength lies)” tiah a chim ve.

Lungrualnak kong cu tampi chim len a hau lo, a ṭhatnak kan theih dih. A ṭhatnak kan theih cio ko caah a tak in i rual cang usih. Hmailei ah zeidah kan lawh lai ti chim khawh a si lo. A zungzal in lungrual khawh zong a si fawn lo. Asinain tutan khuapau dohthlennak ah kan lung aa rual ahcun kan miphun tuanbia aa thleng hrimhrim lai ti tu cu ka chim ngam.

SAC Nih Camp Victoria Kap Hna Seh Law; SAC nih Camp Victoria hi an kap taktak lai lo tiah a chimmi an um. Cheukhat nih cun a kah te ko lai tiah an zumh ve. Keimah pumpak pumpak zong nih an kah te lai ti hi ka zumh, a tuan le a tlai tu cu chim awk a ṭha hnga lo!

An kap lai lo ti an zumhnak a ruang pahnih a um. Pakhatnak, Camp Victoria ah dohthlennak ralkap lawng an um lo, mi sawhsawh tampi an um. Cun Camp kiangkap ah khua an tampi. Pahnihnak, Camp Victoria cu Myanmar-India ramri ah ummi a si i cunglei in bomb thlak ahcun India ramchungah a tla kho. A tlak ahcun India cozah he an i mithmai chiat kho.

Asinain SAC nih hriamtlai le tlailo an thleidang lo. Camp ah mi sawhsawh tampi an ummi le a kiangkap ah khua zeimawzat a um ruangah SAC nih Camp Victoria kah an timhmi an i leet (ṭhulh) lai lo. Cun India ramhcung i an bomb (a ningin a si kho i a pelpawi zong a si kho) tlak ding zong an ṭih lai lo.

Myanmar ramkhel thiamsang U Than Soe Naing nih “CNF nih hmunpi (headquarter) cu an ngei ko nain a dang tein a si lo. Mi sawhsawh khua hna lakah a ummi a si. Cucaah CNF hmunpi khi bomb thlak hnawh hna seh law tambik a tuar ding cu mipi an si” tiah a chim.

U Than Soe Naing nih cun “SAC nih bomb an thlak ahcun India ramchungah a tla ko lai. Asinain cucu SAC nih an ṭih lai lo. A ruang cu India ramchung i bomb a tlak hmanh ah India nih mawhchiatnak bia a chim luklak lai i zeihmanh a tuah lai lo ti an theih” tiah a chimchap.

SAC nih CNF hmunpi kap an timh timi hi SAC ṭanhtu media Telegram Channel ah cunglei in Camp Victoria an lakmi hmanthlak he an tar i an lungtlinnak an langhter. Cu lawng si loin Kalay vanlawngbual ah raldohnak vanlawng pahnih timhcia tein an chiah cang tiah theih a si. Cucaah Camp Victoria hi an kah te lai ti hi zumh a um ko!

CNF chimnak nawlngeitu Salai Htet Ni nih cun “Vanral i vennak kan ngei lo. Vanlawng le hriamngan in kahnak i runvennak kongah kan tha a der. Zeitindah kan i thuhnawh lai. Mi sawhsawh si hna seh, hiamtlai si hna seh a si khawh chungin i timhtuah cu kan hau” tiah The Irrawaddy News ah a chim.

Cu ruangah SAC nih Camp Victoria hi kap hna seh law dohthlennak ralkap hna lawng si loin mipi zong kan tuar ngaingai lai ti a fiang. Cucaah i thuhnak khur (bunker) kan i cawh cio ah a ṭha, a si khawh ahcun khua he aa hlat deuhnak ah hmunhma ṭha tein i ser cio ding a si. I ralrin le a hlankan in i timhtuah chung tlukin a ṭhami a um lo.
Cherhchan: CNF ဌာနချုပ်ကို စစ်ကောင်စီ ဗုံးကြဲဖို့ ကြံရွယ်နေသလား (The Irrawaddy News). Salai CP Lian, CEO, The Chin Post

Be the first to comment

Leave a Reply

Your email address will not be published.


*