Vanlawng lei ralbawi le ralkap zeimawzat an tlaih khawhmi hna hih a ruang!

Hmawbi Vanlawng Chiahnak Ah Bomb Hmanh A Si, Ralbawi Le Ralkap Zeimawzat Tlaih An Tong!
=========
Hmawbi Vanlawng Chiahnak Ah Bomb Hmanh A Si, Ralbawi Le Ralkap Zeimawzat Tlaih An Tong! SAC ralkap nih raltuknak vanlawng an chiahnak Yangon, Hmawbi vanlawng chiahnak hmun cu June 28 zaanlei ah bomb hmanh a si nain a tlolh, tiah CDM ralkap Hlait Si nih a chim. Kayin ramkulh Okarihṭa(ဥကရစ်ထ) camp a kaptu KNDO, KNLA le PDF hna cu SAC ralkap nih raltuknak vanlawng in pehzulh in an kah peng hna caah Hmawbi vanlawng chiahnak cu bomb puahhnawh ding in kan hmanhmi a si, tiah Mizapi ralkap Hlait Si nih cun a chimchap.

June 28 zaanlei ah khan Hmawbi vanlawng chiahnak hmun chung ah kan lut kho i, security an hngahnak kan pal khawh hnu ah Yark 130 raltuknak vanlawng 6 an chiahnak hmun ah bomb kan hmanh. June 29 zinglei suimilam 1:00 hrawng ah, cu hmun kan chuahtak khawh hnu ah a hlatnak in kan hmanhmi bomb cu puak ding in kan hmeh nain an puak lo, tiah mizapi ralkap Hlait Si nih cun a chim.

Vanlawng chiahnak hmun chung i bomb hmanh a si caah June 29 chun ah, vanlei ralkap(Air force) bawi le ralkap hna cu SAC ralkap security hngaktu nih an tlaih hna. Vanlei ralkap lutlaibik cu amah pumpak in Hmawbi vanlawng chiahnak ah, bomb hmanhnak kong hlathlatnak an tuah lio tiah theih a si.

“Nizaan chunhnu ah Hmawbi in ṬadaU(တံတားဦး) a phanmi cheukhat cu Y8 vanlawng he lakhruak in cunglei nih an auh hna i, YeGyiAi(ရေကြည်အိုင်) ah an kalpi hna. Hmawbi ummi zong an i tel, rallam sialnak hmun ah an kalpi hna, an phone zong an chuh hna,” tiah Hmawbi media nih a langhter.

Tedim Ah Mibawmchantu Phu Chungtel Mino 2 Tlaih An Tong! Tedim Ah Mibawmchantu Phu Chungtel Mino 2 Tlaih An Tong!: Chin ramkulh, Tedim ah a luancia June 27 ahkhan Shalom mino mibawmchantu phu chungtel 2 cu SAC ralkap nih an tlaih hna, tiah tualchung mi nih RFA ah nihin June 30 ah an chim.

Tlaih a tongmi hna cu Saya Muam le Salai Lian Siang an si i, tualchung hriamtlai phu PDF-Zoland nih SAC sinaginn ah aho hmanh kai lo ding tiah ralrinpeknak cathanh an chuahmi cu Tedim khuachung ah tlang au in thawngthanhnak an tuah caah tlaih an ton hi a si, tiah Tedim khuami pakhat nih a chim.

Tlaih a tongmi saya Muam le Salai Lian Siang cu Tedim palik sakhan ah chiah an si, tiah tualchung mi nih an chim. Tedim khuami 2 tlaihkhih an tonnak kong ah SAC ralkap lei nih thawngthanhnak an tuah rih lo. A luancia June 3 zong ahkhan Tedim khuachung um, SAC ralkap uk duhlonak langhter in CDM a tuahtu siangcachimtu 2 cu SAC ralkap nih an rak tlaih hna.

Pyapon Ah Misual 3 Cu Thih Tiang Hrithlai Ding In Biaceihpiak An Si!: Ayeyawady ramṭhen, Pyapon(ဖျာပုံ) ah kum tling lo ngakchia tlaihhrem in, a pu pa zong a thattu pa 3 hna cu June 29 ah Pyapon pengkomh biaceihzung ah hrithlai ding in bia ceihpiak an si, tiah theih a si.

Thih tiang hrithlai ding in bia ceihpiak mi pa 3 hna cu 2021 khan Kahmahkahlu(ကမကလူ) khuakomp, Minhlasuh(မင်းလှစု) khua leikuang ah khua a sa mi an si i, Leikung ah cun inn ngeitu pakhat an thah i a ngeihchiah sui cui khat an laak pinah a tunu kum 12 ngakchia cu an tlaihhrem tiah theih a si. Cu pa 3 hna cu Pyapon pengkomh biaceihzung nih kumkhat le cheu chung an konglam an tuak hnu ah phungrelnak(U) 41/2021 in nizaan ah hrithlai ding in bia an khiahpiak hna, tiah theih a si.

Kyaikhṭu Tualchung Hriamtlai Phufonh le SAC Ralkap Nithum Chung Kahdohnak Ah SAC Ralkal 5 An Thi. Kyaikhṭu Tualchung Hriamtlai Phufonh le SAC Ralkap Nithum Chung Kahdohnak Ah SAC Ralkal 5 An Thi: SAC ralkap nih umhmun an khuarnak camp le chekhlatnak an tuahnak gate cu Kyaikhṭu Revolutionary Force(KRF), Kyaikhṭu tualchung hriamtlai phufonh le KNLA nih an kah hna i, nithum chung kahdohnak ah SAC ralkap 5 an thi, 6 hliamhma an tuar tiah KRF nih cathanh an chuah.

KNU brigade 1 hmunram, Bilin peng NatGyi(နတ်ကြီး) le Zikung(ဇီးကုန်း) SAC ralkap camp cu June 22 le 23 ahkhan kah an rak si. Cun, June 24 ah HṭiWakhaLuh(ထီးဝါခလု) khua pawng i SAC ralkap umhmun an khuarnak inn pakhat cu kah ṭhan a si tiah an langhter. Nithum chung kahdohnak ah SAC ralkap lei in minung 5 an thi i, minung 6 nak tam nih hliamhma an tuar, tiah KRF nih an thanh.

SAC ralkap an hramcah tiang kahdohnak ah kan i tel lai i, mizapi nunnak le innlo kan runven lai, SAC ralkap kuttang um thawngpetu dalan le SAC ralkap bawmchantu hna pohpoh cu kan doh hna lai, tiah KRF nih an cathanh ah an langhter.

Okarihṭa Camp Chanh Ding In A Kalmi SAC Ralkap Zeimawzat Cu Kahdohnak Ah An Thi!: Kayin ramkulh Myawady peng, Okarihṭa (ဥကရစ်ထ) camp lei ah an hawile bawm ding in a kalmi SAC ralkap hna cu nihin June 30 ah PDF nih an kah hna caah zeimawzat an thi, tiah Southern Regional Military Headquarters in PDF nih an thanh.

SAC ralkap nih Okarihṭa(ဥကရစ်ထ) camp cu sungh an duh lo caah vanlei in runvennak an tuah i, tanglei in an hawile nih bawmh an timh hna lio ah PDF nih tamlak an rak thah hna. Kahdohnak ah cun PDF lei in thi le hliam an um lo, tiah PDF nih an thanh

Myaung Le Minkin Um SAC Ralkap Kahdohnak Ah SAC Ralkap 6 An Thi! Myaung Le Minkin Um SAC Ralkap Kahdohnak Ah SAC Ralkap 6 An Thi!: Sagaing ramṭhen Myaung peng, ShwePan (ရွှေပန်း) khua ah umhmun khuarmi SAC ralkap 70 hrawng cu Chaung U Local Defense Force (CHULDF) nih June 29, zinglei suimilam 9:58 ah an kah hna. Cu kahdohnak ah cun SAC ralkap le pyusawhṭi chungtel 2 an thi, tiah Chaung U Local Defense Force nih an thanh.

Cu kahdohnak ah cun Chaung U Local Defense Force (CHU LDF) in ralkap 15 nih kutser meithal in ShwePan(ရွှေပန်း) khuachung um SAC ralkap cu an kah hna. SAC ralkap nih hriamngan le hriamhme in an kah ve hna nain LDF lei hliam tuar um loin hnu an tolh, tiah theih a si. Cu hnu ah SAC ralkap pakhat cu sniper kahnak in a thi i, bomb puahnak in pyusawhṭi chungtel 3 zong an thi, tiah media nih an langhter.

Bhamo Ah Tlaih A Tong Mi Minung 9 Lak Ah 4 Cu Taza Cuai An Si!: Kachin ramkulh Bhamo(ဗန်းမော်) Thasi(သာစည်) sang trafic point ah palek 2 kah an si hnu in tlaih a tong mi civil mi 9 lak ah 5 cu an luat i, a dang 4 cu taza cuai an si, tiah tualchung mi hna sin in theih a si.

Cupinah nizaan (June 29) zing Sml 11 hrawng ah civil mi hna a tlaitu palek bawi Kyaw Ko Ko Tanh(ကျော်ကိုကိုသန့်) hruai mi palek hna nih dawr pakhat an boh i, thil man sung le computer pawl zong an laak tiah theih a si. Uknak laak a si hnu in Bhamo khuachung ah atu le tu ti awk in bomb a puak i, SAC ralkap nih civil mi 20 hrawng an tlaih cang hna, tiah theih a si.

Kyonphopin Sianginn I Ummi SAC Ralkap Bomb Thlakhnawh An Si I, 2 An Thi! Sagaing ramṭhen, Ayadaw nitlak lei ah ummi Kyonphopin(ကျွန်းဖိုပင်) khua sianginn ah umhmun a khuar mi SAC ralkap cu nihin June 30 chunhnu Sml 2:15 ah tualchung PDF nih drone in bomb an thlakhnawh hna i, ralkap 2 an thih lengah 3 hliam an tuar, tiah Zero pyohcia phu nih an thanh.

Sianginn i ummi SAC ralkap hna nih cun an pawngkam lam a pal mi khualtlawng le mawṭaw hna dirter in hramhram in phaisa an hal tawn hna ruangah an doh hnanak a si, tiah theih a si. Cu kahdohnak cu Zero pyohcia(Myinmu), ZERO POWER(Sagaing), Danger Force ṭangrual phu i bawn in an tuah mi a si, tiah theih a si. Credit; The Chin Post

Be the first to comment

Leave a Reply

Your email address will not be published.


*