Vauruang Hruaitu Pakhat A Si Mi Dr. Bawi Uk Thang

“Vaurawng Zuunthil” i hruaitu pakhat asimi Dr Salai Bawi Uk Thang nih facebook Live ai thlahmi a zohmi kan tam ngaingai. A duhfahtuk lungin a chim i, a tah ha a mang. A mithli a tla dengte khi asi. Zantim khuamang ah khua a hun ka ruahter ngaingai i; a chimmi chungin tlawmpal vun bet chap ka duh.

Chin mino ram3nak i khua a sami hi ka tuak ningah;

✅US ah 10,000- in 20,000 karlak
✅Australia ah 3,000 in 5,000 karlak
✅Canada ah 500 leng
✅EU lei ah 1,000 leng
✅New Zealand ah 200 leng
A dangdang zongah an um len rih.

Hi vialte thazaang hi a neptemi asilo. Kan ram buainak kongah a thawkka ah protest hrawng le Social media hrawngin, le lam cung duhlonak langhter pawl ahcun kan itel ngai cio hna. Caan a vun rau i kan daidup; ngeihchiah chawva in siseh, Cozah le INGO pawl nawrnak ah cawlcanghnak zong a dai bak.

Laitlang i a rak thanglianmi kum 30 cung hi cu pekchanhnak ah an itel lenmi hmuh khawh asi. Ram 2nak i kulilek le sianginn kai ah a kalmi tu hi thazaang an chuah taktak. Asinain nule pa nih ralzam dirhmun in ramleng ah phakpimi (kum 18 in kum 30) karlak mino hna cawlcanghnak a dai.

Kan ram thatlo ruangah ramdang an kan zampi i, kan ram sersiam thannak dingah tuanvo kan ngei tihi kan philh cangmi a lo. Kan mission kan hngalh tilomi a lo. Thawhburh ah, kan nule kan pale hna an tha a baa ngaingai cang.

A lamkip in kan tuah khawhmi a tampi; ngeihchiah chawva zongah rian thatha a tuanmi le hlawh thatha a eimi, Cozah, Rights Groups le INGO lei nawrnak zongah theihhngalhnak tampi a ngeimi nan um ko tung, ziah daite in a theilomi bantukin kan um hnga tihi ruah ngaingai a hau than. Hi vialte thazaang hi Chinland cu chimlo; Burma rampi hmanh a thleng kho dingmi thazaang asi. Kan pawngkam i Kawl le Tlangcungmi mino zong kan isawm hna lai.

Ihrim than in biatak deuhin kan cawlcangh a hau cang. Kan semnak kan laihri tannak kan ram, le kan miphun, kan unau hna Ralhrang kut in an luatnak dingah kan tanrual a hauhtuk lio caan asi. Biatak deuh le khuafaak deuh ruat in kan thazaang kan hun ihrim than a hau.

Nifatin thisen nunnak a pe cuahmahmi kan unau hna “hram thawng” na thei ve maw? Na theih ko bu in dah hna naa chit rih ko lai maw?

 

Be the first to comment

Leave a Reply

Your email address will not be published.


*