Very Good; CDF-Hakha Tuanbia Tawi!

CDF-Hakha Tuanbia Tawi!
==========
CDF-Hakha cu 2021 March 21 in Hakha peng chung pengtlang dihlak aiawh meeting tuahnak in a hramthok a si. 2021 March 26 ah Ralkap thithruainak muisam thok a si. 2021 April 14-15 ah Camp Victoria ah CNF/A upa hna he Chinland Defense Force – Hakha tiah a min pek a si.

2021 April thla ah hriamnam zalh thok a si. 2021 April 29 ah a hmasa bik kahdohnak caah strategy ṭial a si. 2021 May 2 ah a hmasa bik kahdohnak cu Cawbuk Gate in kan thok, nihin ni tiang langhterawk a ṭhami ah voi 76 leng kahdohnak kan tuah cang. Bomb puah le hnahnawhnak pek pawl cu kan rel ti lo.

Cu hna pawl tel cun voi 100 renglo ral kan tu cang. Cu chungah cun ralhrang 372 hrawng kan thah hna i 106 naktam nih hliam an tuar. Ralhrang hriamniam 1 kan chuhmi le CDM in an luhpimi zun 7 a si. Ralkap CDM a rak lutmi minung 30 hrawng an si. CDF-Hakha ralkap minung 12 nih an nunnak an pek cang i minung 25-30 kar nih hliamhma an tuar.

Kum khat chungah sing 20,000 leng tangka kan hman. Ram 8 ah CDF-Hakha dirkamhtu phu an kan dirhpiak i cu hna nihcun tangka in an kan bawmh. Vaurawng Zunthil le pumpak zong in bawmhnak tampi an kan pek. 2022 May 28 ni ah kumkhat tlinnak cu Pathian thawng in tlamtling tein kan tuah khawh. CDF-Hakha kumkhat tlin cawlcanghnak

Zapi Sin Thawngthanhnak; Hakha peng dothlennak cu Chinland Defense Force – Hakha Council in kalpi ding tiah Hakha peng dothlennak minung zapi tonnak le lungtlinnak in 2022 May 1 ni ah biachahnak tuah a si cang. CDF-Hakha kumkhat tlin camtuak (March 21) le a voi (1)nak CDF-Hakha Council, EC le OC meeting zong CDF-Hakha chungtel dihlak minung 400 leng Hakha peng hmun pakhat ah 2022 May 26-30 tiang hlunghlai ngai in kan tuah i a tanglei bantukin zapi sinah thawngthanhnak kan hun tuah.

1. CDF-Hakha Council cu MiE, Senthang, Zokhua peng le Hakha khuapi chung dihlak fonh in dothlennak caah tuahmi a si bantukin cu Hakha peng ahcun CDF-Hakha Council lawnglawng do a tlami dothlennak bu a si.

2. CDF-Hakha Council hmunhma chung kilvennak, humhimnak, phungsernak, zatlang uknak le biaceihnak kong vialte ah dothlennak caan chung cu CNF/A dirpinak he CDF-Hakha Council nih tuanvo a lak cang lai.

3. Min Aung Hlaing le a ralhrang ralkap hna cu ralhrang an si caah mizapi sin in uknak an kan chuh ni 2021 February 1 ni thok in an tuahmi vialte cu dotla an si lo.

4. 2021 February 1 in mizapi kut ah nawlngeihnak a phak hlan tiang ralhrang cozah (SAC) nih a tuahmi vialte cu dotla lo an si caah hrawh le hnawn a si lai lengah 2022 June 1 ni thokin ralhrang cozah SAC riantuannak siseh, cu riantuannak ah aa telmi le tha a pemi vialte cu mizapi, ram le miphun caah tih a nungmi ralhrang le an riantuannak a si tiah dantatnak tuah nan si cang lai.

5. Dothlennak caan chungah mizapi zulh awk (order) hna zong Council nih a herhning in a chuah lengmang cang lai caah nan zulh cio naklai thawng kan in thanh hna. Cu bantukin mizapi theih awk vialte cu Chinland Defense Force – Hakha timi le Hakha Campaign for Justice timi Facebook Page ah zoh khawh lengmang a si lai. CDF-Hakha Council

Chin Ram Khuapi Chung SAC Sianginn On Mi An Hlawh A Tling Lai Lo: Salai Timmy; SAC ralkap nih Chin ramkulh khuapi 7 ah sianginn on ding in an i zuam nak cu an thlamtling lai lo tiah Chinland Joint Defense Committee ( CJDC ) General Secretary Salai Timmy nih Mizimma ah a chim. Chin ralkap hna nih khuapi chung tiang an hip khawh rih lo caah SAC ralkap nih khuapi chung sianginn on an i zuam hi a si i khuate lei zapi cu Chin ralkap hna nih an hip khawh dih tiah a chim.

Chin ralkap nih an hip khawh nak hmunhma hna zong sianginn an on piak ko hna tiah Salai Timmy nih a chim. Chin ramkulh pengkulh 9 ah SAC ralkap nih Thantlang le Kanpetlet dah ti lo a dang pengkulh 7 hna ah sianginn kan on lai tiah cathanh an chuah.

SAC ralkap nih Chin ramkulh ah sianginn on than ding in an i zuamnak cu an phaisa luhnak ah le ramkip hmuhsak khawh nak caah an tuah mi a si tiah Chinland Joint Defense Committee CJDC nih nihin May 30 ah cathanh an chuah.

Kanmah Chin ram ah cun SAC ralkap phaisa luhchuahnak a cawlcaang kho tilo, Fimcawnnak lei lawng si lo in ngandamnak lei zongah a tuah khawh mi a um lo ti tluk si. Cu ruangah ramkip ah kan dik ko tiah hmuhter an duh ruangah fim cawnnak lei cu an hman ” tiah CJDC General Secretary Salai Timmy nih chim.

Chin ramkulh chung um nu le pa hna zong nih SAC ralkap sal dirhmun ah fim cawnnak le SAC ralkap phaisa cawlcangh nak ah i tel lo ding le Chin Union hruainak in on mi sianginn ah kan fa le cu kai ter cio ding in kan sawm hna tiah CJDC nih a langhter. SAC ralkap kuttang fimcawnnak le an phaisa chuahluh nak ah thazaang a pe tu Non CDM hna cu fak piin dantaatnak kan tuah lai tiah CJDC nih cathanh a chuah.

Falam Ah Cheukhat Siangngakchia Sianginn Kai An I Tim. Chin ramkulh, Falam SAC kuttang sianginn ah cheukhat siangngakchia an kai lai, tiah theih a si.

Falam ummi pakhat nih,”an fale sianginn kaiter a duhmi zong an um. Cheukhat cu sianginn ah form an va lak, Form latu cheukhat nih form cu kan lak ko lai, kan fale sianginn kaiter le kaiter lo kong tu cu kan ruah te lai, Form tu cu lak phot ding a si ko an ti,” tiah a chim.

“Tanghra camipuai a phi lomi cheukhat zong, a ra laimi June thla in SAC nih a hun ding sianginn ah camipuai phit aa timi an um,” tiah a chimchap. Kan hnute ahkhan SAC ralkap an fale cu sianginn an kai, motor in an thlah an don hna, SAC ralkap fale sianginn kaimi cu an tam ngai ngai, tiah theih a si.

Hakha zong ah SAC ralkap kuttang rianṭuantu hna nih, siangngakchia sianginn kaiter ding le form lak khawh a si cangnak kong cu loud speaker in an rak au.

Paletwa Peng Abawngta Khuami Hna Cu SAC Ralkap Nih An Hrem Hna Hnu Ah An Kalpi Hna! Paletwa peng Abawngta(အဘောင်သား) khuami hna cu SAC ralkap nih an tukvelh hna i khuami cheukhat cu Supoh(ဆူးပုတ်) tlang lei ah an kalpi hna tiah khuami nih an chim.

May 30, zinglei suimilam 10:40 hrawngah SAC ralkap thazaang 60 hrawng cu Paletwa peng Abawng khua ah an lut i khuachung mi hna cu an tukvelh hna leng ah an phone zong an chuh hna tiah khuami nih cun an chim. Abawngta (အဘောင်းသား) khua ah cun SAC ralkap khah-lah-yah 232 tat-mah 55 le khah-lah-yah 539 phufonh in thazaang 60 hrawng cu an lut i, Abawngta khuami cu an tukvelh hna cun Supoh(ဆူးပုတ်) tlang lei ah an kaipi hna tiah an chim.

A luancia May 26 ah Abawngta khuapawng ah SAC ralkap le AA kar kahdohnak a chuah hnu ah Abawngta khuachung inn hra uktu cu tlaihkhih a tonnak in thlah a si nain khuabawi cu thlah a si rihlo tiah khuami nih an chim.

Paletwa Ah Kum 20 Hrawng Mino Pakhat Bomb Lamh Sual Ruang Ah A Ke Bul. Chin ramkulh, Paletwa peng Ngachia khua Khumi Chin (ခူမီး) miphun, mino pakhat cu bomb lamh sual ruangah a ke orhlei a bul deng caah Sittwe(စစ်တွေ) sii-inn ah an kalpi, tiah bawmchantu hna nih an chim.

“May 29 zanlei sml 3:00 hrawng ah an khua in meng 1 hrawng a hlatnak Mikyaung(မီးကျောင်း) tlang, lo a kal i a rak tlun lei ah bomb aa lamh sual,” tiah Kyaukdaw khua bawmchantu phu in An hruaitu Ngi Puh nih a chim. “Orhlei a ke fiangbeo kam in a bul deng. Tan ding dirhmun a si ko. A pum chung zong ah hliamhma a khat, a holh cu holh kho ko,” tiah a chimchap.

Kum 20 hrawng mino Ngachia khua Khumi Chin miphun Aung Aung Oo cu lo rian a ṭuanmi a si, tiah a chungkhar nih an chim. Aung Aung Oo cu bomb nih a puahnak hmun i Bawmchantu phu hna nih vokkuanglawng in Kyauktaw lei an kalpi i, Sittwe mizaw motor nih a laak, tiah Ngi Puh nih a chim.

Mikyaung tlang cu a luancia 2018 kum ah SAC ralkap le AA karah kahdohnak a chuahnak hmun a si pin ah SAC ralkap umhmun an khuarnak a si, tiah tualchung mi hna nih an chim. Credit: The Chin

Be the first to comment

Leave a Reply

Your email address will not be published.


*