Zelensky Nih Ukraine ram hmailei kong a chim thanmi cu uar a um tuk ee!

Zelensky: “Sievierodonetsk i Tuksapur Kahdohnak nih hin Donbas i a Hmailei Dirhmun Lai a Rel te ko lai”
==========
June 9 (GRCM) – Sievierodonetsk khua kahdohnak cu a zualhma ngai i, Donbas pengkulh i a hmailei dirhmun lai a reltu kahdohnak a si te lai, tiah Zelensky nih a chim. Russia nih nichuahlei Ukraine lak a duh caah a tu bantuk in fak taktak in kahdohnak a tuah hi a si.

Kyiv khualipi a lak khawh ti lo hnu in cun, Donbas pengkulh lei tu ah ai mer. Hi pengkulh a hmun zeimazat hrawng cu 2014 lio tein khan anmah Russia a tantu Ukraine tapung kut a phan cang, tiah theih a si. Feb. 24 i Ukraine a luhhnawh rii le bang khan cun, Donbas pengkulh i cheuthum ah cheukhat tluk cu Russia kut a phan cang. “Sievierodonetsk i kahdohnak hi a tuksapur a si. Tutan ral kan tukmi vialte lakah a harsabikmi a si kho men. Sievierodonetsk hi Donbas i a laifang ah a ummi a si. Kan Donbas pengkulh a hmailei dirhmun lai a reltu khua a si,” tiin Zelensky nih Wednesday ah khan a chim.

Wednesday ah khan cun Ukraien ralkap pawl cu Sievierodonetsk a lenglei tiang hnung an tolh, asinain cuka hmun in cun an i chan khawh chung paoh i chan i kahdohnak pehzulh dingin bia an i kam, ti asi. “Kan ral nih kan units pawl mortars, miapi le rocket tluan tampi in an kan kah. Sievierodonetsk, Lysychansk, Privillya, Ustynivka, Horske le Katerynivka i mipi khuasaknak inn le lo zong hual lo in a kah hna,” tiah Ukraine general staff nih Thursday ah khan a chim.

Cu ti a chimmi cu Russia lei nih an cohlang lo. Luhansk pengkulh chungum khua pawl bomb in a dentuk tikah hmangsommi lopil ko an lo cang, tiah an governor Serhiy Gaidai nih a chim. Sievierodonetsk a ummi kan chemical plant zong bomb in an kah i a liamcia suimilam 24 chung i mipi an thahmi hi 4 an si, tiin Gaidai nih a chim.
Sievierodonetsk ah a ummi khua hmate Kysychansk cu Ukraine kut ah a um ko rih. Asinain inn le lo tam u cu Russia nih an hrawh dih cang hna, tiah Gaidai nih a chim.

Khua pahnih ah a tlungmi kahdohnak kongah Reuters nih cun a fekfuanmi fehternak kan tuah kho rih lo an ti. “Luhansk le Donetsk belte ah cun Russia ralkap milu nih Ukraien ralkap milu a chilh ngaingai,” tiin CNN ah US i Ukraine ambassador nih a chim. “Kyiv i kahdohnak ah zeidah a cang, ti cu kan theih cia a si bangin, lawlawse kan sungh dingmi thil an um. Biapihla kan ruah awk a si thenglo mi thil tampi an um. Russia nih kan hmunhma an lakmi pawl cu kan chuh viar te ko hna lai” tiin Oksana Markarova nih a chim. Luhansk i 98% tluk cu Russia kut a phan cang, tiah Gaidai nih a chim.

Pathian nih a ka Khamh; Donbas pengkulh chungah a biapibikmi khua a si mi Sievierodonetsk ah cun nunau le hngakchia pawl cu Wednesday ah khan bomhnak tirawl dawn in an artlang in an i tlar hna. Khuapi cul in a mikip nih tipung in tii an than lulh hna. Khuami tam u nih khua an chuahtak ko nain, a tangmi hi 24,000 hrawng cu an si rih lai, tiah a cozah nih a chim.

“Ka in cu Russia nih an vun kah i, kan thlalangawng le innleng vialte ai rawk dih. Thlangkuai mi cu ka cungah an tla, asinain Pathian nih a ka khamh. Ka pum khat in ai riin dih” tiah kum 85 a si cangmi tar Albina Petrovna nih a chim. A liamcia suimilaam 24 chung i Russia nih Donbas pengkulh cungum khua 20 a kah lio ah mipi 4 an thi. Kan ralkap nih Russia ralkap 31 kan thah ve hna, tiah Ukraine ralkap nih an chim.

Donetsk ah a ummi Soledar khua zong cu Wednesday ah khan Russia nih bomb in an kah i mipi cu kawmtang lawngah an i duup hna. “Chunzan zan in an kan kah. Pehzulh in bomb an kan thlakhnawh. A zungzal ti awk ngakcha in kawmtang ah khua kan sa. Chun paoh ah kan inn kan chuahtak i, bomb nih a hlanhlonak kawmtang ah cun kai vai duup hna. Zaan paoh ah inn lei kan panh cio than hna, tiah khuachungmi pakhat nih a chim. “Hi thil hi zeitik ah hme ai lim te hnga?” tiin kum 65 a si cangmi Antonina nih tap pah thluakmah buin biahalnak a tuah.

Lakphak dawr, eidin zuarnak dawr le sianginn library hna cu Russia bomb nih a kah i mei a thawh ruangah, mipi 2 an thi, 4 hma an pu, tiah Kharkiv emergency nih an chim. Nazi lungput a ngeimi kan innpa Ukraine hi hriamnaam tlai kho ti hlah seh, ti ka duh caah ka luhhnawhmi a si, tiin nihin tiang zongah Moscow nih a ti peng ko rih. Ukraine lei a ramdanghawi pawl belte nih cun sualtuk ruangah mi ramdang a kan luhhnawh hi mipi a thongthong in an nunnak a lak, tiin an ti ve.

Russia nih Ukraine a luhhnawhhnu i ramdang a zaammi Ukraine mipi hi 7 million an phan cang, tiah UN nih a chim.
Facang kongah Ning lawng a Ti Ukraine nih vawleicung facang zuartambik ram ah ai tel ve i, Russia nih Ukraine Black Sea le Azov Sea ports a phih ruangah vawleicung ah paam a tlunter te lai, tiin Western ram pawl nih Russia cu a thangchiat ngaingai. Tirawl i thaatlonak a ruang tham cu namah Western pawl nih kan cung i phihkharnak nan tuah ruangah pei a si ko cu, tiin Moscow nih a chim ve.

Ukraine i a Black Sea ports pawl awnpiak khawh than dingin puaisa (broker) ka tuan lai, tiin Turkey nih thazaang a chuah. Hi ports (rili tilawng dinhnak) pawl he UN nih an tuahmi hnatlaknak (deal) pawl hi cu ceihkham khawh an si te kho men, tiin Russia foreign minister Sergei Lavrov he Wednesday i tonnak an ngeih hnu ah Turkey foregn minister Mevlut Cavusoglu nih a chim.

Ukraine porst pawl hi awn than khawh an si ko lai, asinain Ukraine lei nih bomb an tarhmi pawl hi an phelh viar ta hma sa a hau, tiin Lavrov nih a chim. Biaka lawng in Russia nih biakamnak an tuahmi cu kan cohlang kho lo. Heh tiah cun pei kan lo, thlairah vialte cu a hrawh tualmal ko rih cu, tiin Ukraine lei nih an chim ve. Kan hnung zarh a dih lei sang ah khan Ukraine pumpi ah thlai an chiahnak a tamnakbik pakhat a si mi inn pipi cu Russia nih bomb in a hrawhpiak dih hna.

“Vawlei tirawl a herhmi hi tingco kho hna hlah seh, ti a duh caah a tu bantukin Russia nih kan vawleipi a ning a tither hi a si,” tiin Mykolaiv pengukbawi Vitaliy Kim nih Reuters ah a chim. Russia facang pawl vawleicung markets an phak than khawhnak dingah cun Western nih phihkharnak an kan tuahmi hi an lak than a hau, tiin Putin nih a chim.

“Ukraine kan ralkap pawl vawleipi nih nan kan bomh lo a si ah cun, hi ralhi Russia nih diplomat hmangin donghter ai timh lai ka zum hrimhrim lo,” tiin video in Yale University summit of business i biachimnak a ngeih lio ah Zelensky nih a chim. “Kan ram hi mahtein ai ukmi, a dingmi le punghman kan si. Kan ralkap thazaangchuahmi zong khuaruahhar a si. Kan ram chung te ah raal kan tu. Duhsah in kan nawr cuahmah hna. A tu bantuk tein kan kal tialmal ko rih lai,” tiin a chim. Credit: Chelsea Bawi

Be the first to comment

Leave a Reply

Your email address will not be published.


*