Zingku pa (Pu Thawng Lian), na thawng theih cu kan chungkhar caah tuar a har tuk e!

Zingku pa (Pu Thawng Lian), na thawng theih cu kan chungkhar caah tuar a har tuk e!
============
Zathal kan um lio in nihin tiang a kan dawtu ka u Zingku pa (Pu Thawng Lian), na thawng theih cu kan chungkhar caah tuar a har tuk e. Hakha i hringtu ka pa na va lenlio hmanh ah Cycle Luchinh na chinh, tu bantukin na lu naa khawn i na kan liamtak hi cu kan celh hrim lo e.

Na tantakmi na nupi le na fale, na unau pawl he phone i chawnh lai zong hi kan tih tuk e. Zei ti tha va kal chung ko ne law. Tantakmi chungkhar Bawipa nih in hnemh ko hna seh.

Zaṭhal Khuami Pu Thawng Lian Cu Cycle Pah Sualnak In A Nunnak A Liam! Hakha peng, Zaṭhal khuami Pu Thawng Lian (kum 50 tluk) cu cycle i pah sualnak in October 15 zan sml 12:00 hrawng a nunnak a liam, tiah theih a si.

Zaṭhal khuami pakhat nih, “Kawl lei ah Caw lak ding in a kal i, a rak kir lio October 15 zanlei sml 1:00 hrawngah Sakta khua pawng Thi Va pawng ah cycle pakhat he an i pah sual caah a lu a kuai i, Hakha sii-inn ah an kalpi.

Siibawi te nih an damh khawh ti lo caah a nunnak a liam,” tiah a chim. Cycle an i pah lioah pakhat deuh cu a cycle a rawk dih ko nain zeihmanh ai khawng lo. Pu Thawng Lian tu cu a lu ruh a kuai caah lung fim ti loin a um.

Hakha sii-inn an kalpi ko nain siibawi te nih an damh khawh ti lo caah October 15 zanṭim 12:00 hrawngah Hakha sii-inn ah a nunnak a liam hi a si. Pu Thawng Lian ruak cu nihin October 16 zing sml 8:20 ah a chuahkehnak Zaṭhal khua ah an tlunpi. Pu Thawng Lian nih fanu pali, fapa pakhat le a nupi a tantaak hna.

Malaysia Ah Chin Miphun Pakhat Misual Kut In A Nunnak A Liam! Malaysia ah Cameron Highland (ကင်မရွန်ဟိုက်လဲန်း) cinthlaknak dumah rianṭuanmi Mindat peng Kyalayhlaing (ကြာလေလှိုင်း) khuami Salai Aung Thang cu misual pawl nih an thah tiah theih a si.

October ni 14 zaan ah misual pawl nih a tubantuk in a thilri an fir piak hnu ah an thah hi a si. Aluancia september ni 15 zongah Malaysia ram Cameron Highland ṭhiam ah Mindatpa pakhat thah a rak tongbal cang tiah theih a si.

MDF Le CDF Mara Buainak Kong Ah Adang Hriamtlaibu Nih Ralring Tein Nan Kalpi Aherh Teh Lai! MDF le CDF Mara an buaika hin,kan miphun hriamtlaibu aho an va si zongah a nih kan bawmh lai i, anih cu kan bawmh lailo timi ruahnak hi kan nei lo ah atha tiah upa cheukhat sin ah ka rak chim bal hna. Anih kan bawmh lai i, anih kan bawmh lailo timi ruahnak nakin zeitindah kan fonh khawh hna lai timi lampi tu hi kan kawl ah atha bik lai ti zong ka rak chim bal.

Hi tihin ka chimnak aruangcu; miphun aikhat mi buainak hi ralhrang pawl he kan buaimi nakin,tih a nungdeuh ti hi ka hmuh ning a si caah thil kan kalpi tikah tlukruan te le ralring ngai in kalpi aherh ngai ti hi ka ruah caah a si. Culawng siloin,Miphun aikhat mi buainak nihhin rampi buainak tiang khi ahnursuan khawh ti zong hi ruahchih peng aherh ton caah ralrin aherh khunnak cu a si.

Naitan EMAJAC statement kha kan zohtik ah CDF Mara abawmmi vialte kan ram in kan in thawl hna lai an ti. Hi biafang an hman mi hi a huap mi akau ngai caah pumpak cio le hriamtlaibu zeimazat kha a hnursuan teh hna lai. Ruah awk ngai asi mi cu EMAJAC statement hi a hrang sawhsawh mi ‘thli’ bantuk maw asi lai? ruah le rial he ahrang mi ‘thli’ bantuk dah asi lai ti hi a si.

Zei paoh va si seh law; Mizoram Cozah nih atih bik mi cu,Mipi thin hung hi a si. Mipi nih kan duh lo tiah lamcung an chuak i sualnak aneih lomi mi zong an va that ah siseh, mi inn hna mei in an va khangh ah siseh Cozah nih a ti ngam hna lo i, mipi lei tu in atang ve tawn. Hi ruang ah hin Mizoram upadi nih mipi thin hung hi a ngamh lo an ti tonnak hi a si.

Voikhat cu ka hawi pa John Beingaichi nih MADC hruaitu a ka len pi i, aka timi cu him tein um nan duh ahcun nan umnak khua pawngkam he khan daw le rem tein rak um u, nan umnak khua pawngkam nih hna a kan hnawk tiah report aral sual ahcun kan nih kan rian cu thawl le dawi a si ko a ka ti. Abia a peh rih cu kan nih cu mipi thimmi kan si i mipi lei in kan dir zungzal lai.

keimah pumpak nihcun kan dawttuk hna zong ah mipi mithmai zoh lo awk ka tha lo aka ti. Abia apeh rih mi cu kan hnulei ah bomb nan chiah mi Chapi pa nih aalamh sual mi kong ahkhan ngaithiam nan va hal mi hna kha nan thiam tuk,, in ngaithiam loin um hna sehlaw MAP battalions 3 tiang nan camp kah dingah kan rak thlah hna lai, kan ti nain nan i ngaithiam khawh caah nan van atha tuk aka ti.

Voikhat cu kan nau lei mi an ipalh sual i Sangau khuataw tipi ah mi anthlaih hna. Cucu ramri um khua hna nih an lung atling lo caah an bial in MLA atlingmi minister sinah an va chimh. An minister nih Mizoram cozah sinah achimh hna i, Aizawl in akan dawi dih. Ka chim duhmi cu ramri pawngah thil fate asi mi zong kha Mizoram cozah sin aphak ton tikah thil fate ah kan ruah mi nihhin harnak nganpi akan pek tawn.

Nihin kanram dirhmun kan zohtikah ralhrang nih ral an sunghnak deuh paoh ah four cuts policy ‘phiat 4 phiat’ policy hi fakdeuh in ahman chin lengmang. Hi policy hi hmailei ah fakdeuh in ahman ahcun zeilei paoh ah kan fuhpanh hna ding mi cu Mizoram hi an si teh lai. Abikin dohthlennak atuahmi tam deuh kan lampi cu Saiha distict hi a si. Cucaah Siaha district mipi he kan ihmuhthiam lo ahcun harnak nganpi kan ton teh lai.

Atulio Mizoram cozah ah State of minister atlaimi khi MTP president sau ngai atuanmi le siaha bialin atlingmi Dr Beichua a si. Adang MLA zong an um len rih. Hi hna pawl nihhin Mizoram cozah sinah an lungtlin lonak anphak pi sual ahcun Siaha distict lawng ah siloin Mizoram pumpi tiang khin harnak kan ton khawhmi a si.

EMAJAC hi nitlak lei Mara ram ahcun an suttung lawng te an si hna. Ramkhel lei hruaitu bu an i tel. Biaknak lei hruaitu bu an i tel. uknak lei hruaitu bu zong an i tel pinah mino lei hruaitu bu zong an i tel rih. Khelkhat in kan chim asi ahcun nitlak lei Mara an suttung nupa vialte an i tel dih. Mizoram ah thawl le dawi kan tonmi tuanbia zohtik ah mi pakhat hnih nih mi antlaihrem mi hna le rithnai sii a zuar mi mi pakhat hnih ruang ahkhin tawl ledawi kan ton theu.

Akan thawl mi bu hi MYA hi ahrampi an si lengmang. YMA nih an ka thawl lio ah khatlei ah MZP le NGO hna nih akan kilhkamh than ve tawn. Chimh duhmi cu Mizoram in akan thawl mi khi Mizo bu dihlak fawnhmi khi an si theng lo… ka langhter duh mi cu EMAJAC hna hi an dihlak bu fonh an si caah an cathanh ning in thil an kalpi taktak asi ahcun,; cuhlan akan thawlmi ton mi nakin afak deuh khawhmi a si.

Cucaah MDF le CDF Mara buainak ahhin zeibantuk bu le phu nan si zong ah remdainak he kalpi loin bukhat lawng kha ‘keh’ lei tha zaang ah hman duh ruangah nan tanhpi hna asi ahcun mah le mah le mah harnak nganpi ipek khi asi teh lai. Uico an iseh lio ah kanmah tanhmi uico nih tei seh tiah kan bawmh i kan bawmhmi Uico nih khatlei Uico kha tei loin kanmah tu kha fak ngai in akan seh chih khawh ti hi kan philh lo abiapi ngaingai. Credit: Van Neih Thang