Zoh Ah Hin Ngeihchia Kho Tuk. .Hringtu Nulepa Dawt Cang Hna Uh Sih

Hringtu nu le pa daw cang hna u sih;-

❤️ Khrih ah ka unau hna na zapi te cungah Bawipa dawtnak cu a thar in um ko seh. Bawipa Pathian nih an dawt tuk hna ee..

🙏 Nu le pa nih hin kan mui a kan hmuh hlan in siseh, a kan hmuhka tein siseh zeitluk in dah an rak i lawmh i an rak kan dawt. Pathian sin thluachuah fanu/fapa kan don cang tiin kan cutzat tiang a kan zoh khenhtu an si. Kan hmet tein a kan cawmtu, fim a kan chimtu le kan biakmi kan Bawipa le kan Pathian sinah thluachuah a kan hal piak zungzaltu an si. Nu le pa cu mithmuh kan pathian an si bantuk in kan upat in kan hmazah hna i kan dawt zungzal hna awk kha a si..

🙏 Nu le pa dawtnak le zohkhenhnak hna a thei lomi fa le kan dir hmun zoh tikah hin kan caah tih a nung tuk. Kan van upa deuhdeuh i zu ding te hna le thil thalo tuahnak thinlung te hna kha kan hun ngei. Nu le pa cu zeiah kan rel ti hna loh. An kan cawnpiakmi zong zeiah kan rel ti loh. Kan duhduh in kan kut le kan ke kan thlak ngam hna. An mitthli kan tlakter zungzal fawn hna. Nu le pa hi kan hngakchiat lio i kan i khawngden sual hmanh ah khan a kan filtawl i a kan thlop bultu an si ti zong kha kan philh dih cang. Khurkhua hi fakdeuh in ruat cang hna u sih. Nu le pa hi hngakchiat lio lawngah kan nu le kan pa si hna hlah seh. An tar hnu zongah kan nu le kan pa si hna sehlaw, kan upatmi le kan hmaizahmi, mithmuh pathian si zungzal hna seh..

🙏 Mithmuh pathian kan nu le kan pa hmanh kan dawt hna lo i zeiah kan rel hna lo a si ahcun a kan sartu kan Pathian chinchin cu kan dawt in zeiah kan rel kho taktak loh ti cu a fiang ko. Pathian hi a min lawngin thei hna hlah u sih. Kan nunnak taktakin a dawtnak hi thei hna u sihlaw amah zong daw in upatnak zong kha pe zungzal hna u sih. Pathian cu Thlarau a si caah mit in hmuh khawh a si lo i amah kan dawt kan ti a si ko ahcun kan mit in kan hmuh khawhmi le kan pawng te ah a um zungzalmi kan nu le kan pa hi daw bak hna u suh. Cun upatnak le hmaizatnak zong kha pe hna u sih. A tlingmi dawtnak thinlung he zoh khenh hna u sih. Kan caah a zungzal in Pathian sin thluachuah hal piaktu an si ti zong kha philh bak hna hlah u sih..

🙏 An hringtu na nu le na pa an mitthli na tlakter sual maw? Na kut le na ke na thla sual hna maw? An bia na el sual maw? Cun an duh lomi thil teh na tuah sual maw? Pumpak cioin kan nun i check hna u sihlaw a tuah sualmi kan um a si ahcun Pathian tih bu tein i ngaichihnak thinlung dihlak he ngaihthiam hal cang hna u sih. Nu le pa upat, tihzah le dawt cu thluachuah hmuhnak a si tiah Cathiang chungnah kan hmuh bantukin hi vawlei kan nun chungah hin thluachuah hmuh a duhmi kan si dih ko ahcun a kan hringtu kan nu le kan pa, kan mithmuh pathian zong a simi hna hi zungzal in upatnak le hmaizatnak pek le dawt khawh hrimhrim kha i zuam cang hna u sih tinak thinlung put he ka bia ka donghter..

🙏 Khrih ah dawtmi u le nau hna kannih cu zumtu tha kan si bantukin hringtu nu le pa daw cang hna u sih. Careltu nan dihlak cungah Bawipa Pathian nih a Thiang Thlarau in pe hna sehlaw cu Thiang Thlarau nih cun nu le pa dawt khawhnak thinlung put tha in pe ko hna seh. Cun fimnak, damnak le hlawhtlinnak thluachuah zong kha in chap hna seh..

Thank You For All;
Johnly Fambawl

 

Be the first to comment

Leave a Reply

Your email address will not be published.


*