Zophei ram ka dawt ve caah Zophei ram Le Chin ram sersiam thannak ah ka lungput!

Zophei ram ka dawt ve caah Zophei ram Le Chin ram sersiam thannak ah ka lungput
=============
Ca ka tialmi narel hlan ah ka lungput cu Hakha khua cu kan Khualipi a si kan dirkam hrim hrim lai. Hakha mi hi an tang kan dor peng hna lai khuapi lungput an ngeih dawtnak an ngei an hmun le hma an kan sianh dih i, khuapi sernak ah cun sianlo timi an ngai bal lo.

Thantlang cu kan nu le kan pa an si, a bik in Biaknak lei a thawngbikmi Zophei Baptist Association (ZPBA)a kan hringtu an si (TABC) in Zophei Baptist Association (ZPBA) thluachuah a kan petu an si, kan upat hna lai, kan tihzah fawn hna lai. Kan khualipi thantlang kan ser than khawh nakhnga thlaza kan cam Bawipa nih a tak ramah a can ter te lai. An mah huatmak aa tel bak lo.

Ca ka tial duh mi; Chinram ah biaknak lei a thawngbikmi Chin Baptist Convention (CBC)nih cohlan, theihpi nak in Baptist Association timi (tahchunnak- Lautu Baptist Association (or) Zophei Baptist Association – TABC nih 1995 February 26 ah thluachuahnak rak pek mi a si. TABC nih ZPBA thluachuah a rak pek ni thawk in kum (30) dengmang biaknak lei in rak kalpi a si cang i, fawi tein zophei ram kan ithithruai khawhnak tehte (evidence) tha tein hmuh khawh a si.

Cu caah kan ram kongah Teinak kan hmuh tikah cun Chin State Federal government nithawng tangah (CBC) nih hram a rak fehter cangmi biaknak lei Association base hi thlalang bantuk in i zohchun chih in (Myoe Nwe Suh) hram bunh in sermi Federal District Council ukhruainak hi kan Chinram sersiamnak ah a thabik mi a si lai tiah ruahchannak a um. Abik in Zophei, Zotung, Lautu, Mara Senthang (ZZMLS) ram sersiam thannak ah a tha khun lai.

Mirang chan le ramuk bawi chan ah (Feudalism) timi ramuk bawi pakhat nih khuate pazeizat dah kan ngeih khawh timi zuamcawhnak in tahfung an rak hman tawn i khuate tamdeuh a ngeihmi hi rumra an rak ngeih deuh tawn. Cu ve bantuk a luancia caan in Min Aung Hlaing nih uknak a laknak caan tiang Chin State zawngah peng (9) in rak hruai le uknak rak ser a si. Uknak peng pakhat tangah khuate tamtuk chiah a si tikah khuate thanchonak an rak kan serpiak kho lo.

Phundang in chim ahcun peng pakhat tangah khuate tampi chiah le ngeih kan duh ko nain khuate hna lam le sulh,mei le ti, fim cawnnak, ngandamnak an hmuh khawhnak ding caah zeihmanh serpiak duhlo le serpiak khawh tunglo in a um mi chinram peng (9) uknak hi kan thatpi taktak maw timi hi ruah awktha thil pakhat cu a si ve tiah ka zumh. Tahchunak ah peng (9) khuapi hna ah suimilam (24) chung mei a chuah ko lio le kahtaya voi zeizat chah in dah kan phah than khawh tiah an izuam lio ah khuate lei lam cu nawncek lam lawmgte in a khat.

Cun peng pakhat tangah khuate pa zeizah tam in dah kan chiah khawh hna timi lungput nakin Chin State Federal Council thihruainak nithawng tangah tlukruang tein Budget phawt in khuate khuapi thledannak ngeilo tein kanmah le kan um nak ram le pengtlang te kan sersiam cio hi chin rampi tthanchoter le Chinram sersiam cu a si ko. Phun dang in chim ah cun zophei kan thancho cu laitlang than Cho a si ve.

Zophei ram ah thildik alawkthalo a cangmi hna tampi lakak in tlomte; 1. Lampi achiatnak bik hmun, 2. Congret lam cu chim hlah lunghak phahmi lam hmanh a phanlonak hmun, 3. Zan ah muibiknak hmun le ram(electric mei umlonak hmun), 4. Tanghra Sianginntha pakhat hmanh a umlo nak hmun, 5. Din ti thathi a umlonak hmun le ram. 6. Siizung tha a um lo nak hmun.

A cunglei langhter mi (Fact-check) (6)thil a caannak a hrampi (Root cause-a muru) cu (ကျေးလက် ဖွံ့ဖြိုးရေး(Or) Rural Development) budget lawngin a luancia Chin State Cozah nih an kan zoh tawn caah a si. Chin State a Cozah total budget chung in Zophei ram ah budget an rak kan pek tawnmi (%) zatuak in (0.0000000001) percent (%) hmanh an kan pek tawn lo. Zeiruangah dah hi bantuk in budget a rak kan pek tawn lo ti ah cun khuate lei pek tawn mi (ကျေးလက် ဖွံ့ဖြိုး.ရေး(budget men men lawngin an kan zoh caah a si.

Nain Chin State Federal Democracy ukhruainak nithawng tang ah sermi District Council thithruainak tang ahcun Zophei ram ah Khuapi ser kan duh ve cang i, (ကျေးလက်) si kan duh ti lo, Kah-ta-ya) Congret lamphah le zulh kan duh ve cang, suimilam (24) meihmuh kan duh ve cang, suimilam (24) kan innchung teah ti chuahter kan duh ve cang, sianginn thabik ngeih kan duh ve cang,sizung thabik ngeih kan duh ve cang.

Hi kan duh mi thil vialte hi, chin ram peng (9) chungah a um mi hna nih an kan sersiam piak lai lo i, kawl ram mi le ramdangmi le mirang hna nih an rak kan serpiak lai lo. Kan mah nih kan ser a hau, kan mah nih kan hal a hau, kan mah nih kan thawk a hau. A herh ah cun nem tein le tangdornak zawng in kan hal hna lai i,Federal Democracy right hi a man a fak tuk mi a si caah a herh ah cun kahdohnak le thisen-nunthapnak thap tiang zawngin teinak hmuh khawh hrim hrim kan izuam a hau. A herhbik mi cu kan karlak ah(unity) timi lungrualnak kan ngei hi a biapi bik ko.
Ca tial tu: Pastor Andrew Dawt Cung Sawmhal

Be the first to comment

Leave a Reply

Your email address will not be published.


*