Zualko: CDF-Mindat Ralkap 2 Ruak Nihin ah an Char Chap!

Zualko: CDF-Mindat Ralkap 2 Ruak Nihin ah an Char Chap
———–
Nizaan June 29 kahdohnak ah a tlaumi CDF-Mindat ralkap 2 hna i an ruak cu nihin June 30 chun sml. 1:00 ah CDF-Mindat ralkap pawl nih an hmuh, tiah thawng kan theih. Nizaan zaanlei ah CDF-Mindat le SAC ralhrang karlak kahdohnak voi 2 a chuak. Cu kahdohnak ah cun CDF-Mindat ralkap pakhat a thi i, a dang pahnih an tlau.

Nihin ah an charmi miruak pahnih hi nizaan kahdohnak ah a tlaumi an si, tiah CDF-Mindat ttuanvo ngeitu nih BBC ah a chim. Nizaan kahdohnak ah SAC ralhrang pathum an thi i hliamhma a pumi zong an um len, tiah CDF-Mindat nih thawngpang an chuah.

Mindat kahdohnak ah hngakchia pakhat le CDF-Mindat hriamtlai pakhat an nunnak a liam! Chin ramkulh, Mindat peng ah SAC ralkap le CDF-Mindat cu June 29 ah kahdohnak a chuak i CDF-Mindat hriamtlai pakhat hriamngan nih a khen i a kirnak lam ah a nunnak a liam tiah CDF-Mindat thawngthanhnak nih a langhter.

CDF-Mindat hriamtlai pakhat zong fak tuk loin aa hliam tiah theih a si. June 29 zinglei ah Mindat khua ah a ummi SAC ralkap battalion 274 nih Madat khua lei ah hriamngan voi 6 a kah ruangah kum 14 hngakchia pakhat a nunnak a liam.

A nunnak a liammi hi SAC ralkap hriamngan ruangah a ke khatlei a bulmi hngakchia i a u zong a si. Mindat peng, June 29 zaanlei sml 2 hrawng ah voikhat, zaanlei sml 3 hrawng ah voikhat tiah kahdohnak a chuak i SAC ralkap 4 an thi tiah CDF-Mindat nih a thanh.

Chin ramkulh ah raifanh zawtnak a karh; Sii pawl a phak lo ruang le mi umlonak hmun ah sautuk um a si ruangah tukum chung Chin ramkulh ah raifanh in a zawmi an tam tiah Chin mipi Doctor pawl nih VOA ah an chim. Kahdohnak ruangah SAC nih lam a phih i an dirhmun a zual khun tiah an chim.

Chin ramkulh ah kahdoh buainak a karh chin bantuk in lam pehtlaihnak a um ti lo ruang, mipi cheukhat cu hmunkhat in adang hmunkhat ah an i ṭhial caah rianrang in ngandamnak lei zohkhenhnak a har tiah Chin mipi phu nih VOA ah an chim. Sii, khiangthawng le puan pawl a zaatnak in tawlrel khawh a si lo caah fur chung ah hin raifanh zawtnak a karh chin tiah Chin mipi Doctor Salai Tin Moe nih VOA ah a chim.

“Ralzaam pawl an karh, i ṭhialkam a tam lio caan a si i ramtang lawng ah um a si caah fikfa nih a seh hna, khiangthawng a um lo le an dinti ruangah a si lai. Cheukhat cu an tlikzaamnak ah an i put manh lo. IDP camp hna ahcun an ngei kho men. Cheukhat cu khiangthawng i kham loin puan caah hman a si. A biapi cu khamhnak lei a chanbau tuk ruangah a si”.

Thlanglei Laitlang, Paletwa peng, a luancia caan ah raifanh zawtnak a rak um ko nain a hnu cun Kanpetlet, Matupi, Mindat le Hakha khuapi chung tiang a karh. Cheukhat peng hna zongah raifanh a lomi an um pah ko nain check nak thilrii ṭha tein a um lo caah fiang tein chim awk a ṭha lo tiah Chin mipi phu nih VOA ah an chim. Atu ahcun, ralzaam camp hna ah raifanh ruangah a nunnak a liammi zong an um tiah Mindat ralzaam camp rianngeitu nih VOA ah a chim. Kahdohnak ruangah lam a pit i sizung kalpi ding ah harnak a um.

“Umkalnak riikhiah piak kan si caah a zual tukmi lawng Paletwa khuapi ah kalpi a si. Sizung saya/mah te zong nih raifanh zawtnak cu ṭha tein an zoh tuk lo. A hnu ahcun a thimi an tam. Hngakchia, upa, tiang an thi”. Chin ramkulh ah atu bantuk in raifanh zawtnak a karh hlan ah Karen le Kayah ram hna ah raifanh zawtnak a rak karh tuk ve. Cucaah sii le a herhmi thilrii pawl mahka hmunhma lei ah a rak phanh bantuk in cheukhat cu a hlan tein aa khon ciami an um caah raifanh khamhnak sii pawl cawk a rak har.

Myanmar ram a hlan kum 3/4 chung ah raifanh zawtnak a zor tuk nain atu kum ahcun sii le thlopbulnak a ngah lo caah cheukhat hmunhma hna ahcun a karh chin lai tiah phan a um. Laos, Vietnam, Thai le Myanmar hna ah raifanh zawtnak ṭih a nungmi ram pawk an i pehtlai tiah WHO nih ralrin a pek.

Kalaymyo, Tintha khuami 5,000 leng bawmhnak an herh; Sagaing ramṭhen, Kalay peng thlanglei, Tintha khua ah SAC ralkap pawl June 27 ah an luh ruangah khuami 5,000 hrawng eidin harnak an tong tiah khuami hna nih RFA ah an chim. SAC ralkap pawl June 27-28 ah zaanhnih riak in khuachung ah hmunhma an khuar caah khuami 10,000 an zaam i khuami 5,000 hrawng cu khuachung an kir cang ko nain 5,000 hrawng cu kir ngam loin an um caah fur a si i ruahkhamnak le eidin harnak an tong tiah khuami pakhat nih RFA ah a chim.

Kalay thlanglei, Tintha khua hi inn 2,500 leng in milu 10,000 hrawng an umnak khua a si i PDF pawl an um tiah ruahdamh in SAC ralkap pawl khuachung an rak lut tawn i kah an tong lengmang tiah a chim. A luancia May thla thok hrawng ah SAC ralkap pawl Tintha khua ah an lut i PDF pawl he kahdohnak a chuah caah mipi inn 30 hrawng an khangh tiah khuami hna nih an chim.

A luancia February 6 zong ah Tintha khuachung ah SAC ralkap nih hriamngan an kah i khuami 9 an i khawng, mipi inn 9 a rak rawk tiah khuami hna nih RFA ah an chim. Credit: The Chinland Post

Be the first to comment

Leave a Reply

Your email address will not be published.


*