Zualko: Chinmi Minung 2 cu ralhrang nih an kan thah piak than e, a poi tuk hringhran!

Tedim Ah Ramvai Mi Mino 2 SAC Ralkap Nih An Thah Hna
=======
Lai meithal i put in ram a vai mi Chin ramkulh, Tedim peng Saizaang(ဆိုင်းဇန်) khuami pahnih cu SAC ralkap nih an tlaih hna hnu ah an nunnak an lak hna tiah khuami nih an chim.

SAC ralkap kut in nunnak a liammi Salai Pawng Za Mawng le Salai Pawng Sun Thang hna cu Hmuapi(မွှာပီး) khuapawng ramlak ah ni 6 chung ram an veih hnu an kirlei May 21 ah SAC ralkap he an i tong i an tlaih hna hnu ah an thah hna tiah chungkhar he neihniam in ummi nih a chim.

Anmah he hmunkhat ah ram vaih in a kirti mi hna cu hmai ah an kalchung caah an luat, Lai meithal he an si caah CDF in an ruah hna i tlaih an ton hi a si, inn an phanhlo caah hlathlainak tuah hnu lawng ah an nunnak a liam cang tiah theih an si. An pahnih in CDF chungtel tiin ruah an si caah SAC ralkal nih an thah hna” tiah a chim.

Khuachung mi pahnih thah an tonnak kong he pehtlai in SAC ralkal lei media nih cun cu khuami pahnih hna cu CDF chungtel an si tiah an tial. SAC ralkap kut in nunnak a liammi hna he neihniam in a ummi hna nihcun anmah cu mi sawhsawh an si, ramvaih in a paw ai cawm mi an si tiah an chim.

Nunnak liammi Salai Pawng Za Mawng cu kum 29 a si i, Salai Pawng Sun Thang cu kum 21 a si. Cazin kan lak khawh ning ah SAC ralkap nih hramhram uknak an lak hnu ah SAC ralkap kut in Chin ramkulh chungah nunnak liam mi 200 tluk hrawng an si cang, cu chung in minung 6 cu Tedim khuami an si tiah RFA nih an tial.

Shwetawngyan Rili Kam Ah Rohingya Ruak 14 An Hmuh. Ayarwady ramtthen, Pathein pengchung Shwetawngyan(ရွှေသောင်ယံ) rili kam ah nizaan May 22 ah Rohingya ruak 14 hmuh a si tiah mi bawmchantu phu chungtel pakhat nih BBC ah a chim.

Nizaan chunhnu tiangah minung 13 ruak hmuh a si, cu hnu zaanlei ah nu pakhat ruak an hmuhthan tiah theih a si. Nunnak liammi hna ruak cu nu lawngte an si, kum upa bik hi kum 40 tlukhrawng a si i kum no bik hi kum 14 tluk a si tiah theih a si.

” Tiva chung tilawng a pem caah hi thil a cangmi a si tiah theih a si. Pa minung 35 cu him tein bawmhchanh an si. Nunnak liammi hna ruak cu nizaan zaanlei Pathein Islam biaknak lei kalphung in rualvuinak an tuahpiak hna” tiah bawmchantu phu in bawmtu pakhat nih a chim.

Yinmapin Peng Mukawng Khuachung Phungki Sianginn Umhmun Khuarmi SAC Ralkap Kahdoh An Tong, 4 An Thi. Sagaing ramtthen, Yinmapin peng Mukawng khuachung phungki sianginn ah umhmun khuarmi SAC ralkap 100 hrawng cu tualchung hriamtlai phu hna nih May 23 zinglei ah hramngan le hriamhme he an kahdoh hna i SAC ralkap lei ralbawi pakhat telh in 4 an thi tiah theih a si.

SAC ralkap nih umhmun an khuarnak hmunhma cu tualchung hriamtlai phu hna le Yinmapin peng hriamtlai phu, Monywa pengkomh battalion 2 hriamtlai phufonh hna nih bomb ah puahhnawh in an kahdoh hna caah SAC ralkap lei 4 an thih leng ah hliamhma tuarmi zong an tam tiah theih a si.

Bomb puahhnawh in kahdoh a tongmi SAC ralkap hna nih kahdoh an ton hnu ah Mukawng khuachung mipi umnak inn 20 leng cu an khangh hnu ah, umhmun an khuarnak phungki sianginn in an zaam tiah tualchung hriamtlai phu nih an thanh.

Yesakyo Peng Sinchawng Pawng Kahdohnak Ah SAC Ralkap 3 An Thi. Magway ramtthen, Yesakyo peng Sinchawng(ဆင်ချောင်း) ti khamnak pawng ah May 23 ah kahdohnak a chuak i, cu kahdohnak ah cun SAC ralkap lei 3 an thi tiah tualchung hriamtlai phu Young Force-UG nih an thanh. May 23, zinglei suimilam 11:00 hrawngah thazaang 60 hrawng he rallam a sialtu SAC ralkal hna cu Sinchawng(ဆင်ချောင်း) ti khamnak pawngah tualchung hriamtlai phu hna nih an kahdoh hna.

Hriamngan le hriamhme hmang in kaphnihkar kahdohnak a chuak i cu kahdohnak ah cun SAC ralkap 3 an thi, hliamhma tuarmi zong an um, Kaphnihkar kahdohnak ah tualchung hriamtlai phu lei hliamhma tuarnak umlo in hnu an tolhkho tiah theihternak an tuah.

Pale Khuachung Phungki Sianginn Ah SAC Hriamngan A Tla, Phungki 4 An Thi.Sagaing ramtthen, Yinmapin pengkomh Pale khuachung Mya Thein Tan(မြသိန်းတန်) phungki sianginn ah SAC ralkap hriamngan a tlak caah phungki 4 an nunnak a laim tiah theih a si. Mya Thein Tan(မြသိန်းတန်) phungki sianginn chung ah May 13 ah khan hriamngan a rak tlak caah sianginn ah ummi phungki 4 an nunnak a rak liam tiah Pale Entertainment nih May 23 ah an thanh.

Pale khuachung ummi pakhat nih cun tualchung hriamtlai phu hna nih Pale khuachung um SAC ralkap hna cu an kah hna caah SAC ralkap lei nih hriamngan in an kah ve hna, cu hriamngan an kahmi cu phungki sianginn ah a tlak caah phungki 4 cu an nunnak a liam” tiah a chim.

Phungki sianginn chungah a tlami SAC ralkap hriamngan cu 30mm tiah aa tialmi a si i, cu bantuk hriamngan kuan cu dohthlengtu phu lei nih kan ngeilo tiah tualchung hriamtlai phu chungtel cheukhat nih an chim. Credit: The Chin Post

Be the first to comment

Leave a Reply

Your email address will not be published.


*